Sita Mbaroni kwa tuhuma za wizi wa fedha za Serikali Nyang’wale

Imewekwa tar.: September 5th, 2018

Watumishi sita pamoja na aliyekuwa Mkurugenzi wa Halmashauri ya wilaya ya Nyang'wale wanashikiliwa na Jeshi la polisi Mkoani Geita baada kubainika kuchezea fedha za miradi ya maendeleo zilizoelekezwa katika Halmashauri ya wilaya ya Nyang'wale.

Kushikiliwa kwa watumishi hao kumetokana na agizo alilolitoa Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo  katika kikao cha Baraza la Madiwani, wananchi na watumishi wa Halmashauri hiyo kilichofanyika katika ukumbi wa Mikutano wa Nyang’wale, Mkoani Geita ambapo ameelekeza vyombo vya dola kufanya kazi yake na tayari wanashikiliwa na jeshi hilo.

Amewataja Watumishi hao kuwa ni aliyekuwa Mkurugenzi wa Halmashauri ya Nyang'wale Calous Gwamagobe, wahasibu Robert Makimu na Godson Mbelwa, Mweka  Hazina  Donatus Pangani, Afisa habari  Paul Zahoro, Katibu wa Afya Alfred Joseph, na Afisa utumishi Muhando Mhando.

Wizi uliofanyika ni katika fedha za miradi ya Afya, Elimu, Jengo la Utawala, na Maji ambapo uchunguzi wa awali umebaini kuna ubadhirifu wa Sh.Bilioni 2.2.

Mhe. Jafo amevitaka vyombo vya Dola kusimamia vyema jambo hilo ili waliohusika mali zao zishikiliwe ili kufidia fedha zilizopotea sambamba na hatua zingine za kisheria.

Hata hivyo Mhe. Jafo amemtaka mwenyekiti wa Halmashauri hiyo pamoja na Makamu wake kujitafakari kama wanafaa kusimamia fedha za wananchi wa Nyang'wale.