Waziri Jafo awataka Ilemela kukamilisha haraka mradi wa standi.

Imewekwa tar.: January 4th, 2021

Na Atley Kuni, Mwanza

WAZIRI wa Nchi, Ofisi ya Rais Tawala za Mikoa na Serikali za Mitaa, Mhe. Selemani Jafo ameuagiza uongozi wa Halmashauri ya Manispaa ya Ilemela mkoani Mwanza, kuhakikisha unasimamia kikamilifu ujenzi wa stand unaoendelea ili ukamilika kwa wakati kama ilivyo pangwa.

Waziri Jafo, ametoa kauli hiyo muda mfupi baada yakutembela na kukagua ujenzi wa mradi wa stendi ya mabasi na maegesho ya malori wa Nyamongolo jijini Mwanza, leo Januari, 4, mwaka huu.

Mradi huo unatekelezwa na Halmashauri ya Ilemela ikiwa ni moja ya mradi wa kimkakati utakao iwezesha manispaa hiyo kujiongezea mapato ya ndani pindi utakapo kamilika.

“ Nimefarijika kwa ukubwa wa standi hii ya mfano kwani ninaamini katika kanda nzima ya ziwa hakuna standi kama hii, lakini kikubwa katika hili ni ukamilishaji wa ujenzi kwa wakati.

“ Jambo la pili ni hatua ya uendeshaji wake, lazima halmashauri muwe na Ownership (umiliki), hivyo mnapo fikiria juu ya nani aweze kuendesha standi hii lazima awe ni mtu mwenye nidhamu na kutambua mamlaka ya Manispaa na aserikali kwa ujumla,” anasema Jafo.

Mpaka sasa Manispaa ya Ilemela imepokea kutoka Serikalini kiasi cha Sh bilioni 10.1 ikiwa ni fedha kwa ajili ya miradi miwili ya stendi ya mabasi na maegesho ya malori kama sehemu ye fedha za miradi ya kimkakati inayotekelezwa nchi nzima.

Miundominu inayojengwa katika kituo hicho ni maegesho ya mabasi yenye kilomita za mraba 18,000 ikiwa na uwezo wa kuhudumia mabasi 120 kwa wakati mmoja.

Stendi hiyo pia itakuwa maduka, migahawa, sehemu za kukatia tiketi, benki, maduka ya rejereje 74, pamoja na vibanda vya askari viwili na vibanda vya kusubiria usafiri viwili.

Kwa upande wa maegesho ya malori taarifa inaonesha kutakuwa na nyumba ya kulala wageni wenye uwezo wa kuchukua watu 100 kwa wakati mmoja, eneo la maegesho ya malori 100 kwa wakati mmoja, vibanda vya askari viwili, vyoo vya kulipia viwili na ghala lenye uwezo wakutunza mizigo kwa ujazo wa mita za mraba 5,400, pamoja na karakana ya magari yenye uwezo wakuhudumia magari manne kwa wakati mmoja.

Kwa mujibu wa Mchumi wa Halmashauri hiyo, Mophen Mwakajonga, kukamilika kwa Standi hiyo, kutaiwezesha Manispaa ya Ilemela kukusanya ushuru usiopungua, kiasi cha Sh bilioni 2 kwa mwaka ikiwa ni makadiri ya sasa.