Wasimamizi wa elimu fanyeni kazi kwa ushirikiano ili kutoa elimu bora nchini. Mhe. Silinde

Imewekwa tar.: January 16th, 2022

Na Asila Twaha, TAMISEMI

Naibu Waziri Ofisi ya Rais Tawala za Mikoa na Serikali za Mitaa Mhe. David Silinde amewataka  Maafisa Elimu wa Mikoa, Wathibiti  Wakuu wa Ubora wa Shule Kanda kuendelea  kushirikiana kwa kusimamia  Sheria, Kanuni na Miongozo katika utekelezaji  wa  shughuli za elimu nchini.

Mheshimiwa Silinde ameyasema  hayo leo  Januari 15, 2022  Jiijini  Dodoma wakati wa kufunga Mafunzo ya  Uzinduzi  wa  Kalenda  za  Utekelezaji  wa  Mitaala  kwa Maafisa  Elimu wa Mikoa na Wathibiti  Wakuu  wa  Ubora wa Shule Kanda.

Akiendelea kufafanua umuhimu wa Kalenda ya Utekelezaji wa Mitaala Mhe. Silinde amesema ni zana muhimu ambapo ikitumiwa itasaidia kutekeleza mitaala katika muda uliopangwa.

“Maafisa Elimu Mkoa  tambueni kuwa Kalenda ya Utekelezaji wa Mitaala  inaanza kutumika Januari 2022 hivyo, utekelezaji wa mafunzo haya upewe kimpaumbele cha hali ya juu”. amesisitiza Mhe. Silinde

Aidha, Mhe. Silinde amesema  kumekuwa na hofu kuwepo kwa kalenda hiyo   kunaweza kupunguza ubunifu wa mwalimu amewatoa hofu Maafisa  hao  na kuwaelekeza Maafisa Elimu wa Mikoa na Mamlaka za Serikali za Mitaa  kuhakikisha wanashirikiana kwa kufanya uchambuzi wa wakina wakati wa utekelezaji  ili kubainisha changamoto mapema  na zifanyiwe kazi kwa haraka.  

“Hakikisheni mafunzo    yanawafikia walengwa waliomo katika mfumo wa elimu wekiwemo Maafisa Elimu wa Halmashauri, Maafisa Elimu Kata, Wakuu wa Shule na Walimu wote waliopo shuleni” amesema Mhe. Silinde

Akitoa wito kwa Wathibiti Wakuu  wa Ubora wa Shule Kanda kushirikiana na Wathibiti Ubora wa Shule ngazi za Wilaya zilizopo katika Kanda ili Kalenda  za  Utekelezaji  wa  Mitaala  iwe  ni nyenzo ya majukumu yao ya kila siku.

Kwa upande wa Naibu Katibu Mkuu (Elimu) TAMISEMI Gerald Mweli amesema, kwa mafunzo  ya  Kalenda ya Utekelezaji wa Mitaala  ni  kupata mfanano wa utekelezaji wa mitaala nchi nzima,  kupima kwa wakati na  kupima kwa walimu  jinsi watakavyo tekeleza mtaala huo.  

Aidha Naibu Katibu Mkuu Mweli ametoa wito kwa Maafisa hao kuendelea kushirikiana  kwani Kalenda za Utekelezaji wa Mitaala ni mara ya kwanza unaenda kutumika nchini.

Naye Mwenyekiti wa Maafisa Elimu wa Mikoa Bi. Germana Mng’ao ameishukuru Serikali kwa kupata mafunzo ya  Kalenda ya Utekelezaji wa Mitaala  na kuahidi  kushirikiana, kuisimamia na kuitekeleza  kwa ufanisi.