Wananchi waiomba Serikali kuwajengea vituo vya kutolea huduma za afya.

Imewekwa tar.: June 19th, 2019

Wananchi wa Kijiji cha Sunga kata ya Sunga katika Halmashauri ya Wilaya ya Meatu Mkoani Simiyu wameiomba Serikali kuwajengea miundombinu ya vituo vya kutolea huduma ili kuwasaidia wananchi ambao wanatembea umbali mrefu kufuata huduma hiyo.

Wameyasema hayo  mbele ya Timu ya ufuatiliaji inayoshughulika na Mradi wa Huduma ya Afya ya  Uzazi na Mtoto kutoka Ofisi ya Rais Tawala za Mikoa na Serikali za Mitaa OR-TAMISEMI kupitia ufadhili wa Shirika la Umoja wa Mataifa linaloshughulika na Idadi ya watu (UNFPA)iliyotembelea kijiji hicho ili kujionea miundombinu ya Zahanati ya Sunga katika Halmashauri ya Wilaya ya Meatu Mkoani Simiyu.

Bw.Kulwa Lucas ambaye ni mwananchi wa kijiji hicho amesema Zahanati hiyo  inajengo moja lenye vyumba viwili ambapo kimoja hutumika kwa ajili ya huduma zote za mama na mtoto ikiwemo kujifungua na kingine hutumika kwa  huduma zote za magonjwa ya nje  jambo ambalo si sahihi kwa jamii na kinyume cha miongozo ya huduma za afya katika ngazi ya Zahanati.

Amevitaja vijiji vinavyopata huduma katika Zahanati ya Sunga kuwa ni Kijiji cha Iramna ndogo, Kijiji cha Puga  na Kijiji cha Sunga   na miundombinu barabara  ni mibovu na amaeeleza kuwa zahanati hiyo ipo katika umbali wa kilometa 55  kutoka Mjini ambapo ndipo kuna Hospitali ya Wilaya ya Meatu.

“Kijiji cha Sungu ni moja ya kijiji ambacho wanaishia Makabila ya Wasukuma , Wadzabe  na Watindiga ambao mara nyingi huishi ndani ya mashimo, hivyo tunaiomba Serikali kuona umuhimu wa kuwajengea vituo vya kutolea huduma za afya ikiwemo kuboresha na kuongeza majengo mengine katika Zahanati hiyo  ili kuwapunguzia changamoto ya kutembea umbali mrefu kutafuta huduma za hiyo.

Amesema kuwa mama wajawazito wengi huamua kujifungulia kwa wakunga wajadi kutokana na umbali wa vijiji na kutokuwa na usafiri pale wanapohitaji kujifungua pia Zahanati hiyo kutokuwa na wodi ya wazazi na usiri wakati wa kujifungua  imechangia kwa kiasi kikubwa vifo vya mama na mtoto katika kijiji hicho.

Bw. Lucas ameendelea kufafanua kuwa kutokana na udogo wa Zahanati ya Sungu wameamua kubuni mbinu mbadala ambapo watoto hupimwa na kupata huduma ya chanjo chini ya mti ili kupunguza msongamano katika Zahanati hiyo.

Wakati huohuo Mratibu wa Mradi wa Afya ya Uzazi na Mtoto RMNCH-UNFPA na Huduma za Uuguzi kutoka Ofisi ya Rais Tawala za Mikoa na Serikali za Mitaa Bi.  Dinah Atinda amesema tayari serikali kupitia mradi wa UNFPA imetuma fedha kwa ajili ya ujenzi wa jengo la Mama na mtoto na ununuzi wa vifaa ili kupunguza tatizo hilo.

Aidha ameiomba timu ya usimamizi wa huduma za afya katika Mkoa na Halmashauri ya Wilaya ya Meatu kufuatilia na kusimamia kwa karibu ujenzi wa wodi ya wazazi kwa kufuata ramani na miongozo iliyopo ili ikamilike ifikapo Septemba, 2019.

Na. Angela Msimbira MEATU