Vikundi 47 Kondoa vyapewa mikopo ya shilingi milioni 147

Imewekwa tar.: February 24th, 2021

Na Sekela Mwasubila, Kondoa

Halmashauri ya mji wa Kondoa imetoa fedha za mikopo isiyo na riba jumla ya shilingi 147.6 kwa vikundi 47  vya wanawake, vijana na walemavu katika kipindi cha miaka mitano ikiwa ni kutekeza agizo la serikali la kutenga asilimia 10 kutoka mapato ya ndani ya halmashauri.

Mkurugenzi wa Halmashauri ya Mji Msoleni Dakawa amesema mikopo hiyo imetolewa kwa vikundi hivyo vinavyojishughulisha na ufugaji wa Kuku, utengenezaji wa Samani, kilimo cha Umwagiliaji, Ushonaji nguo, upondaji wa Kokoto, Mama lishe, uoshaji wa Magari, uuzaji wa magenge sokoni na utengenezaji ya mikanda na mapambo ya gypsum.

“Lakini pia tuna mpango wa kutoa maguta kwa vikundi vya uzoaji taka na usafi wa mazingira ili viweze kufanya biashara ya uzoaji taka mjini na kujiingizia kipato,”amesema Dakawa.

Mojawapo ya vikundi vilivyonufaika na mikopo hii ni kikundi cha AMSHA AMSHA kilichopo katika kata ya Serya kinachojishughulisha na Kilimo cha umwagiliaji ambacho katika mwaka wa fedha 2018/2019 walipewa kiasi cha shilingi milioni 3 na kulima matikikiti, nyanya na pilipili hoho.

“Tulipovuna tuliuza mazao hayo katika soko la ndani Kondoa na mengine kupeleka mkoani Dodoma na kufanikiwa kupata shilingi milioni 12 na kugawana kwa wanachama wote 10 lakini pia tulifanikiwa kurejesha fedha yote Halmashauri tuliyokopa na kuboresha maisha yetu na kwasasa tunaishi vizuri kabisa,”amesema mmoja wa wanakikundi hicho.

“Kuna wadau wa shirika la SEVIA wapo ndani ya Halmashauri wanatoa ruzuku za pembejeo kwa vikundi vinavyojishughulisha na kilimo cha umwagiliaji tumeongea nao na katika mwaka huu wa fedha wamekiingiza na kikundi hicho na wataona jinsi ya kuwasaidia wao wanatoa msaada wa pembejeo na mashine ndogo ndogo za kilimo pia tutawatembelea wanakikundi ili kuwajulisha hili,”amesema Hassan Kiseto.

Nacho kikundi cha watu wenye ulemavu kiitwacho WANAHARAKATI GROUP wamekiri kupokea mkopo wa shilingi milioni 2.5 na Halmshauri ya Mji Kondoa ili kuboresha hali ya maisha yao na wamerejesha fedha yote na wanaendelea na biashara walizozianzisha.

Mmoja wa wanakikundi Athuman Hassan amesema mkopo huo umemwezesha kukodi kibanda ambacho sasaa anauza vitu vidogo vidogo, amenunua mbuzi wawili wa kufuga shughuli zinazomusaidia kuendesha maisha yake

UPENDO GROUP ni kikundi cha wanawake waliopo katika Soko Kuu la Kondoa chenye jumla ya wanakikundi 10, ambao walifanikiwa kupata mkopo wa shilingi milioni 3 katika mwaka wa fedha 2019/2020 na kufanikiwa kurejesha ndani ya miezi 6.

 “Fedha hizi zimetusaidia kuongezea katika mitaji ya biashara zetu kiukweli na tumefanikiwa kununua mbuzi 15 na kuku 30 wa kienyeji na tunafuga kama kikundi maisha yanaenda tofauti na mwanzo na wenzetu wengine wamefungua magenge yao wanajipatia kipato ila tunaomba serikali ituongezee kiasi cha fedha tufanye shughuli kubwa zaidi,”amesema Fauza Selemani Katibu wa kikundi hicho.

Halmashauri ya Mji Kondoa katika mwaka wa fedha 2020/2021 Halmashauri imetenga jumla ya shilingi milioni 76.8 kwa ajili ya kuvipatia vikundi hivyo.