Vikundi 366 Wilayani Kilwa vyanufaika na mikopo ya sh bilioni 1.1

Imewekwa tar.: February 26th, 2021

Na David Langa, Kilwa

Halmashauri ya Wilaya ya Kilwa, iliyopo mkoani Lindi imefanikiwa kuvikopesha vikundi 366 vya wanawake, vijana na walemavu jumla ya shilingi bilioni 1.1 katika kipindi cha miaka mitano iliyopita.

Mkurugenzi Mtendaji wa Halmashauri ya Wilaya ya Kilwa Renatus Mchau amesema kati ya vikundi 366, vikundi vya wanawake ni 220, vikundi vya vijana ni 134 na vikundi vya walemavu ni 12.

Amesema asilimia 60 ya vikundi vilivyopatiwa mikopo isiyo na riba ni vya wanawake kwasababu wakati mikopo hii inaanza kutolewa wengi walidhani ni mikopo ya wanawake tu na hivyo kusababisha vikundi kama vya vijana kutoshiriki kikamilifu,lakini kadri elimu ilivyoendelea kutolewa makundi mengine kama Vijana na walemavu pia walijitokeza.

Ameongeza kuwa halmashauri yake itaendelea kutenga asilimia 10 ya mapato ya ndani kwa ajili makundi yanayolengwa ili kutekeleza takwa la kisheria kwa kila halmashauri nchini kutenga kiwango hicho kwa ajili ya makundi hayo.

‘’Unajaua hii ni sera ya nchi na hivyo sisi kama halmashauri kila pato linalokusanywa moja kwa moja kuna asilimia kumi ya Vijana ,wanawake na walemavu na mara zote nimehakikisha mikopo hiyo inawafikia walengwa,’’ amesema Mchau.

Mkurugenzi huyo amesema wakati anafika Halmashauri ya Wilaya ya Kilwa hakukuwa na kikundi hata kimoja cha walemavu ambacho kilikuwa kimefikiwa na mikopo  hiyo kwa miaka mitatu mfululizo.

 “Nilikaa na watu wa idara ya maendeleo ili kujua chanzo cha tatizo hilo ambapo katika bajeti ya mwaka 2018/2019 kwa mara ya kwanza vikundi vitano vya walemavu vilifikiwa na kupewa mkopo wa shilingi milioni 36, hii ilikuwa ni hatua kubwa sana katika halmashauri yetu,’’ amesema.

Miongoni mwa vikundi vilivyonufaika na mikopo hiyo na viwango vya mikopo katika mabano kuwa ni Kikundi cha wanawake cha TUNAWEZA kilichopo kijiji cha Mtoni kata ya Miteja kinachojishughulisha na ukamuaji wa mafuta ya nazi ambacho kilipewa shilingi milioni tatu, UMACHEKI kilichopo Kipatimu shilingi milioni tatu, Umoja kata ya Masoko shilingi milioni nne, Kikundi cha ushonaji cha TUSONGEMBELE- Somanga kilipewa sh milioni tatu, na kikundi cha vijana cha usafirishaji Bodaboda cha AMANI Kipatimu, kilipewa sh milioni sita

Ameeleza pia kuna kikundi kingine cha KIVINJE JOGGING CLUB kilichopewa  fedha kwa ajili ya uzoaji wa taka katika kata ya Kivinje ambacho kilipewa gari lenye thamani ya shilingi milioni 18.

Kwa upande wake Mkuu wa Wilaya ya Kilwa Mhe.Christopher Ngubiagai ameelezea kuridhishwa na utoaji wa mikopo na kuwahimiza wanufaika kurejesha mikopo hiyo kwa wakati ili wengine pia waweze kukopa.