Shilingi bilioni moja kujenga barabara za kilomita 105 Ngorongoro

Imewekwa tar.: May 20th, 2021

Na Mathew Kwembe, Dodoma

Serikali imetenga shilingi bilioni moja kwa ajili ya matengenenezo ya barabara zenye urefu wa kilomita 105, mifereji yenye urefu wa kilomita 1. na makalvati 30 wilayani Ngorongoro katika mwaka wa fedha 2021/22.

Kauli hiyo imetolewa jana bungeni jijini Dodoma na Naibu Waziri Ofisi ya Rais TAMISEMI Mhe.David Silinde wakati akijibu swali la Mbunge wa Viti Maalum Mhe Catherine Magige ambaye aliitaka serikali iongeze bajeti ya fedha kwa TARURA Wilayani Ngorongoro ili kukabiliana na uharibifu wa barabara uliotokana na mvua kubwa zilizonyesha msimu wa mwaka 2019 na 2020.

Naibu Waziri amesema katika kukabiliana na changamoto hiyo Wakala wa Barabara za Vijijini na Mijini Halmashauri ya Wilaya ya Ngorongoro katika mwaka wa fedha 2019/20 ulifanya matengenezo ya barabara zenye urefu wa kilomita 94.4, vivuko 15 na daraja moja kwa gharama ya Shilingi bilioni moja.

 Aidha, hadi kufikia Aprili 2021, serikali imeipatia TARURA Halmashauri ya Wilaya ya Ngorongoro Shilingi milioni 917.6 kati ya Shilingi bilioni moja zilizotengwa katika mwaka wa fedha 2020/21 kwa ajili ya matengenezo ya barabara.

Mhe Silinde amesema katika mwaka wa fedha 2019/20 sambamba na matengenezo ya kawaida, Serikali iliipatia TARURA Halmashauri ya Wilaya ya Ngorongoro Shilingi milioni 276.6 kwa ajili matengenezo ya dharura katika barabara zilizoharibiwa na mvua. 

Amesema barabara zilizotengenezwa  ni pamoja na  kipande chenye urefu wa kilomita 1.2 na makalavati 4 katika barabara ya Oldonyowas - Ormania – Piyaya, ujenzi wa makalvati 4 na madrifti 5 katika barabara ya Mdito – Digodigo Oldonyosambu na Matengenezo ya  kipande chenye urefu wa kilomita 1.5 na drifti 1  katika barabara ya Ormania – Oldonyorock.