Serikali yataka Shule za Sekondari zipewe kipaumbele ufadhili wa maabara za kompyuta

Imewekwa tar.: October 29th, 2018

Na Mathew Kwembe

Waziri wa Nchi Ofisi ya Rais Tawala za Mikoa na Serikali za Mitaa Mhe.Selemani Jafo ameutaka Mfuko wa Mawasiliano kwa wote kuangalia uwezekano wa kuzisaidia shule za msingi na sekondari nchini kuwa na kompyuta ili kuwawezesha wanafunzi kutoachwa nyuma na maendeleo ya Teknolojia ya Habari na Mawasiliano

Akizungumza wakati wa ufunguzi wa mafunzo ya TEHAMA kwa walimu wa shule za msingi na sekondari kutoka mikoa 14 nchini yanayofanyika katika chuo cha Teknolojia ya Habari, Mawasiliano na Sayansi kilichopo ndani ya Chuo Kikuu cha Dodoma, Mhe.Jafo alisema kuwa ni muhimu kwa shule zote za sekondari nchini kuwa na maabara ya kompyuta ili kuwawezesha wanafunzi kujifunza kwa vitendo matumizi ya TEHAMA.

Alisema kwa kuanzia angependa kuona mfuko wa mawasiliano kwa wote unafadhili maabara za kompyuta kwa shule zote za sekondari nchini ili wanafunzi wapate elimu ya TEHAMA itakayowawezesha kupambana katika ulimwengu wa sayansi na Teknolojia ya Habari na Mawasiliano.

“Niombe mfuko mtafute namna ya kuzisaidia shule zetu za sekondari zipate kompyuta. Kila sekondari iwe na kompyuta lab, twende awamu kwa awamu,”alisema Mhe.Jafo na kuongeza kuwa  ifike muda kila shule ya sekondari nchini iwe na maabara ya kompyuta.

Alisema kuwa serikali kupitia Ofisi ya Rais TAMISEMI inalenga kuleta mapinduzi ya Elimu Tanzania kwa kuhakikisha kuwa inaboresha miundombinu ya shule na vifaa vya kufundishia na kujifunzia ili kuendana na matakwa ya sera ya elimu ya mwaka 2014

Kwa mujibu wa   sera hiyo,  Elimu ya Sayansi na Teknolojia ni muhimu katika kumuwezesha mwananchi kumudu mazingira yake na kumwezesha kuchangia maendeleo ya Taifa.

Aidha Waziri Jafo aliwataka Maafisa Elimu wa Mikoa na Wilaya kuhakikisha kuwa walimu wote 578 watakaopata mafunzo ya TEHAMA kutoka mikoa 26 ya Tanzania Bara na Mikoa 5 ya Zanzibar  wanayatumia mafunzo hayo kwa malengo yaliyokusudiwa.

Alisema kuwa hatarajii kuona maafisa elimu hao wanakuwa kikwazo kwa walimu waliopata mafunzo haya kitakachowafanya washindwe kwenda kutoa elimu kwa walengwa kama ilivyokusudiwa kwenye uandaaji wa mafunzo hayo.

Pia aliwaagiza wakurugenzi wa Halmashauri  kuhakikisha kuwa wanasimamia utekelezaji wa mpango huo kwa kuhakikisha kuwa hakuna kompyuta lab hata moja itafungwa kwa sababu mbalimbali.

“Sitaki kusikia shule ina kompyuta lab halafu  imefungwa,  nataka kuona shule zote zinatumia kompyuta lab kwa lengo la kuwawezesha wanafunzi waendane na kasi ya mabadiliko ya Sayansi na Teknolojia ya habari,” alisema.

Mapema mwakilishi wa Mtendaji Mkuu wa Mfuko wa Mawasiliano kwa wote Mhandisi Albert Richard alieleza lengo la mafunzo hayo ni kuwawezesha walimu wa shule za msingi na shule za sekondari wanaofundisha somo la TEHAMA waweze kutatua changamoto mbalimbali za mifumo ya habari na mawasiliano  zilizokuwa zikiwakabili wakati wa ufundishaji wa somo hilo.

Pia ni kuwajengea uwezo walimu ili waweze kutumia na kufanya marekebisho ya vifaa mbalimbali vya TEHAMA vilivyopo kwenye shule.

Jumla ya washiriki 289 kutoka mikoa 14 ya Tanzania Bara wanahudhuria mafunzo hayo yanayofanyika katika chuo kikuu cha Dodoma.

Mikoa inayoshiriki mafunzo hayo ni pamoja na Arusha, Dodoma, Geita, Iringa, Kagera, Kigoma, Kilimanjaro, Mara na Morogoro.

Mikoa mingine ni Mwanza, shinyanga, Simiyu, Singida na Tabora.

Mfuko wa Mawasiliano kwa wote ulianzishwa mwaka 2006 na kuanza rasmi mwaka 2009.