Serikali yaagiza Kituo cha Afya Majengo kuhudumia wananchi

Imewekwa tar.: June 9th, 2018

Serikali imeagiza kuanza kutolewa kwa huduma za afya katika kituo cha afya majengo wilayani Nanyamba mkoani Mtwara ndani ya miezi mitatu kwa kuwa ujenzi wa majengo yake yote yapo katika hatua za mwisho.

Akitoa maagizo ya Serikali, Naibu Katibu Mkuu Ofisi ya Rais TAMISEMI, Dkt. Zainab Chaula amesema hakuna haja ya kuchelewesha kutoa huduma za afya katika kituo cha afya majengo kwa kuwa wananchi wanahangaika kuitafuta huduma hiyo mbali wakati miundombinu ya kituo hicho ipo katika hatua za mwisho.

“kwa sababu watu wanahitaji huduma, wanafanya mawasiliano sehemu nyingine ili kupata huduma ambayo hapa haipo, lakini ndani ya miezi mitatu lazima huduma zianze kutolewa, Mganga Mkuu wa Wilaya Nanyamba andaa andiko ili mchakato wa kuanzisha kituo uanze mara moja”

Dkt. Chaula ametoa agizo hilo mbele ya Mkurugenzi wa Halmashauri ya wilaya Nanyamba, Mganga Mkuu wa Mkoa Mtwara, wataalam wengine kutoka Ofisi ya Mkuu wa Mkoa na Ofisi ya Rais TAMISEMI wakati akiongea na wananchi katika mkutano ulioandaliwa baada ya kukagua miundombinu ya kituo cha afya majengo.

Aidha, Chaula amesema wakati Serikali inawapangia vituo watumishi wapya 6,180 imewaweka katika mpango wa kuwapangia vituo watumishi wapya katika vituo vipya vinavyokamilika kwa wakati, lakini pia ametoa angalizo kwa wananchi, watumishi na viongozi wote wilayani Nanyamba kuweka mazingira rafiki ili watumishi wapya wasipatwe na hali ya kuyakataa mazingira ya kazi bali watoe motisha kutatua changamoto hiyo.

Hassan Mnengu ni mwananchi wa kijiji cha majengo anasema huenda usumbufu waliokuwa wakiupata utakwisha kwa kufuata huduma za afya mbali na kijiji chao kwa hivi sasa.

“haya majengo yatatutatulia changamoto zilizopo, moja ya usumbufu ni wa kufuata huduma za afya kutoka Nanyamba kwenda wilaya ya Tandahimba au kituo cha afya kilichopo Nanguruwe”

Katika hatua nyingine, Dkt. Zainab Chaula amewaasa wananchi kupanda miti ya matunda zaidi badala ya miti ya kivuli ikiwa ni pamoja na maeneo ya vituo vya afya kwani ni sehemu ya lishe ya jamii.

Kwa mujibu wa takwimu zilizotolewa, wilaya ya Nanyamba ina zaidi ya wakazi 114,000 na hivyo vituo vitatu vya afya wanavyovijenga wilayani humo, vitakidhi mahitaji ya jamii kwani Sera ya afya inataka watu 50,000 wahudumiwe katika kituo kimoja cha afya.  

Imeandikwa na Fred Kibano