Serikali ''Umakini ni muhimu Tathmini ya Mradi wa DMDP''

Imewekwa tar.: March 7th, 2018

Katibu Mkuu Ofisi ya Rais Tawala za Mikoa na Serikali za Mitaa Mhandisi Mussa Iyombe amewataka washiriki wa kikao cha Tathmini ya Utekelezaji wa Mradi wa Uendelezaji wa Jiji la Dar es Salaam “DMDP” kuwa makini katika kuchambua taarifa za mradi zitakazowasilishwa katika kikao hicho.

Akisoma hotuba kwa niaba ya Katibu Mkuu katika kikao hicho Katibu Tawala wa Mkoa wa Dar es Salaam Bi. Theresia Mbando amesema kuwa tathmini hiyo inayofanyika kwa sasa itasaidia kutambua kwa upana wake huku ikilenga vipengele vyote vinne ambavyo vimelengwa kutekelezwa katika mradi huo.

Wasimamizi wa Mradi wa Uendelezaji wa Jiji la Dar es salaam katika Benki ya Dunia

 wakifuatilia kwa makini uwasilishaji wa mada mbalimbali katika 

kikao cha Tathmini ya Utekelezaji wa Mradi wa DMDP

“Mradi huu Mkubwa wenye lengo la kuboresha Jiji la Dar es salaam ili lizidi kuwa bora katika Sekta ya miundombinu, usafiri mjini, usalama, makazi bora sambamba na kujenga uwezo wa Kitaasisi pamoja na mifumo stahiki na ya kutosha kutunza kumbukumbu na takwimu itakayosaidia katika Ukusanyaji wa mapato ndio ambao tunajadili hapa leo kuangalia namna wataalamu wetu walivyo simamia na nini kimefanyika kwa kiasi gani na kwa kiwango gani” alisema Bi.Mbando.

Aidha Bi. Mbando aliongeza kuwa wanategemea mawazo na  hoja zenu za msingi katika kujenga na kuboresha mipango iliyopo ya Utekelezaji wa mradi huu, ninyi kupitia Kikao hiki mtaboresha mipango iliyopo, mtatukosoa, mtarekebisha na mtatoa mwanga wa njia gani sahihi na bora ya kufuata ili mradi uweze kutekelezwa kwa mafaniko makubwa na kutatua shida za wananchi.

Katika Kikao hicho mwakilishi wa Benki ya Dunia ambaye pia ndiye Msimamizi Kiongozi wa Mradi wa Uendelezaji wa Jiji la Dar es Salaam kutoka Benki ya Dunia Ndg. Erick Dickson amesema Serikali ya Tanzania kwa kushirikiana na Benki ya Dunia wameleta Mradi utakaobadilisha muonekano wa Jiji la hilo.

Aliongeza kuwa kinachotakiwa ni kuangalia kwa Makini namna ambavyo mradi huo unavyotekelezwa katika kipindi hiki cha Nusu Mwaka yale yaliyopangwa yametekelezwa, malengo ya mradi yamefikiwa, Wananchi wamenufaikaje kupitia mradi huo na je hakuna athari zozote za kimazingira zilizotokea bila kusahau ushiriki wa wananchi upo kwa kiasi gani.

Katika awamu ya kwanza ya mradi huu ambao unatekelezwa kwa kipindi cha 2016 -2020 utagharimu jumla ya Dola za Kimarekani Milioni 300 ambazo ni Fedha za Mkopo kutoka Benki ya Dunia.

Aidha Shirika la maendeleo la Nchi za Nordic litatoa ruzuku ya dola za kimarekani milioni 500 kwa ajili ya kukabili changamoto za mabadiliko ya Tabia nchi

Wakati huo huo Serikali ya Uingereza kupitia Shirika la maendeleo la DFID linachangia ruzuku ya Paundi  milioni 25 kwa ajili ya kuboresha Bonde la Mto Msimbazi na Serikali ya Tanzania inachangia dola za kimarekani milioni 25 kwa ajili ya ulipaji wa fidia kwa wananchi wanaoathirika na mradi huo.

Kikao hicho cha Siku tatu kinahusisha wataalamu kutoka Ofisi ya Rais TAMISEMI, Wasimamizi wa mradi kutoka Benki ya Dunia, Wataalam kutoka Halmashauri zote za Mkoa wa Dar es salaam pamoja na washauri wa mradi kutoka kampuni mbalimbali zinazofanya kazi za mradi huu.