SERIKALI INATAMBUA UMUHIMU WA MICHEZO- MHE. WAZIRI MKUU

Imewekwa tar.: August 4th, 2022

OR-TAMISEMI

WAZIRI Mkuu, Mhe.Kassim Majaliwa, amesema Serikali  inatambua umuhimu wa michezo kama moja wapo  ya fursa ya ajira na kiuchumi kwa vijana na Taifa kwa ujumla.

Mhe. Kassim Majaliwa amesema hayo leo Agust 04, 2022 wakati  ufunguzi wa mashindano ya UMITASHUMTA na UMISSETA kwa mwaka 2022 mkoani Tabora.

Amesema kuwa Rais Mhe. Samia Suluhu Hassan ameridhia Mashindano ya UMITASHUMTA na UMISSETA 2022 kufanyika kutokana na kutambua umuhimu wa michezo  kama fursa moja wapo ya ajira na  kiuchumi.

“Rais anatambua na ameahidi kuendelea kuongeza ubora wa miundombinu ya michezo mashuleni ili kuzidi kutengeneza mazingira bora ya wanafunzi kushiriki michezo mbalimbali"

“ Wanamichezo wameanza kuhamasika kushiriki michezo mbalimbali hapa nchini na nje ya nchi, na hii yote inachangiwa na nia njema ya serikali katika kukuza na kutangaza michezo kuanzia katika ngazi ya chini," amesema Mhe. Majaliwa.

Ameongeza kuwa Serikali itaendelea na mpango wake wa kuboresha michezo mashuleni kwa kuwaajiri waalimu wa michezo ambapo tayari waalimu 83 wameshaajiriwa lengo ikiwa na kuzidi kuinua sekta ya michezo nchini.

Awali, Naibu Waziri Ofisi ya Rais Tawala za Mikoa na Serikali za Mitaa, Mhe. David Silinde ameeleza kuwa wanafunzi 3274 na walimu 646 kutoka mikoa yote nchini wanashiriki katika mashindano ya UMITASHUMTA kwa mwaka 2022 mkoani Tabora.

Amesema Serikali inaendelea kuboresha taaluma na michezo nchini kwa kuwekeza fedha katika kuboresha miundombinu ya viwanja vya michezo pamoja na kuwawezesha walimu na wanafunzi kushiriki mashindano kikamilifu.