RC Ruvuma Awakumbuka Wanafunzi wenye Mahitaji Maalum

Imewekwa tar.: March 9th, 2018

Na. Revocatus Kasimba, Mkoani Ruvuma RS.

Mkuu wa mkoa wa Ruvuma Christina Mndeme ametoa msaada wa magodoro ishirini na nne kwa ajili ya kuboresha mazingira ya kuishi wanafunzi wenye ulemavu wa  shule ya msingi Ruhila iliyopo Songea.

Msaada huu ameutoa kwa kukabidhi magodoro husika kwa mkuu wa shule ya msingi Ruhila mchanganyiko Peter Manjati na kuagiza kuwa magodoro hayo yatumike kwa malazi ya wanafunzi walemavu 

Mkuu huyo wa Mkoa alisema ameguswa kuchangia magodoro kutokana na ziara aliyoifanya shuleni hapo mwanzoni mwa mwezi Februari mwaka huu na kujionea mazingira yasiyoridhisha ya malazi kwenye mabweni ya wanafunzi wenye ulemavu

“Nilipotembelea mwanzoni mwa mwezi Februari mwaka huu kuja kuwaona watoto wenye uhitaji maalum hapa Ruhila mwalimu aliniomba nisaidie kuchangia magodoro  kutokana na yaliyokuwepo kuwa yamechakaa sana” alisema Mndeme

Aliongeza kusema kuwa aliguswa mno na hali ya uchakavu wa magodoro  na bweni wanayotumia wanafunzi wenye ulemavu hivyo akaamua kutafuta wapi pa kupata  msaada.

Mndeme katika kuhakikisha anafanikisha upatikanaji wa magodoro haya aliwasiliana na Kampuni ya Vitaform ya Dar es salaam na kuwasilisha ombi ambalo lilikubaliwa na sasa amepatiwa msaada huu

“Ninaishukuru kampuni ya Vitaform  kwa msaada  wao uliowezesha watoto hawa walemavu wapate sehemu nzuri  ya kulala itakayowezesha kusoma vema” Mndeme alisisitiza

Ameomba wadau na wafadhili wengine kujitokeza kusaidia wanafunzi wenye ulemavu kwani bado wanahitaji vifaa vya kujifunzia,mavazi,mafuta kwa albino,miwani na magodoro

Mkuu wa mkoa amewataka walimu na walezi wa watoto wenye ulemavu kusimamia vema hali za watoto wenye ulemavu na kuyatunza magodoro waliyoyapata ili yadumu kwa muda mrefu na kunufaisha wanafunzi wengi zaidi.

Shule ya Msingi Ruhila iliyopo Manispaa ya Songea ina wanafunzi wenye mahitaji  maalum wapatao 51 ambao wanaishi kambini  kwa sasa.

Serikali kwa upande wake inajenga mabweni matatu na kukarabati  majengo ya madarasa mawili ili kuweka mazingira wezeshi kwa wanafunzi wenye ulemavu kujifunza.

Mkuu wa mkoa ametoa wito kwa meneja wa wakala wa majengo mkoa wa Ruvuma Edwin Nnunduma kuhakikisha  wanakamilisha kazi ya ujenzi ndani ya wiki mbili zijazo kwani muda waliopewa tayari umekwisha.