Prof. Shemdoe aipongeza TAMISEMI Sports Club

Imewekwa tar.: November 5th, 2021

Na AsilaTwaha, OR -TAMISEMI, Dodoma

Katibu Mkuu Ofisi ya Rais Tawala za Mikoa na Serikali za Mitaa (OR TAMISEMI) Prof. Riziki Shemdoe amewapongeza wanamichezo wa TAMISEMI Sports Club kwa kuwa mabingwa wa Michezo ya Wizara na Idara za Serikali Tanzania (SHIMIWI) 2021 iliyofanyika katika Manispaa ya Morogoro hivi karibuni.

Akipokea vikombe vya ushindi Novemba 3, 2021 katika Mji wa Serikali Mtumba Jijini Dodoma, Prof. Shemdoe amesema amefurahishwa na ushindi huo kwa wanamichezo hao kwa kujitumana kuwa na nidhamu katika kipindi chote walichokuepo kwenye michezo mjini Morogoro.

“Nidhamu na kujituma kwenu ndio matunda haya ya ushindi, niwaahidi tutaisimamia michezo na kuiendeleza kwani michezo ni mazoezi na ni afya na ukiwa na afya nzuri huleta ufanisi na utendaji mzuri mahala pa kazi” alisema Shemdoe.

Kwa upande wa Mkurugenzi wa Utawala na Rasilimali Watu Victor Kategere alimueleza Prof. Shemdoe timu ya TAMISEMI imetwaa ubingwa na kufanikiwa kushinda mchezo wa riadha, mpira wa miguu, drafti, mchezo wa kuvuta kamba na kuwa washindi wa tatu na kwa upande wa netiboli kufika hatua ya robo fainali na kurusha tufe.

Mwenyekiti wa TAMISEMI Sports Club Alex Morice ameushukuru Uongozi wa Ofisi ya Rais TAMISEMI kwa kujitoa na kuwapa moyo katika kipindi chote walichokuwa wakicheza lakini pia amewaomba waendelee kuisaidia timu hiyo ili iweze kufanya vizuri zaidi.