OR TAMISEMI, PS3 Wapongezwa kwa Mifumo

Imewekwa tar.: June 12th, 2018

OR TAMISEMI, PS3 Wapongezwa kwa Mifumo

Na Atley Kuni OR TAMISEMI
Serikali ya Tanzania kupitia Ofisi ya Rais TAMISEMI na Serikali ya Marekani kupitia shirika lake la Misaada (USAID) zimepongezwa kwa kufadhili na kusimamia utekelezaji wa mradi wa uimarishaji wa mifumo ya sekta ya umma PS3 katika halmashauri 185 nchini.

Pongezi hizo zimetolewa hivi karibuni jijini Mwanza na baadhi ya washiriki wa mafunzo ya mfumo wa Epicor toleo la 10.2, ambao ni Wahasibu na Waweka hazina kutoka Mikoa ya Mwanza, Tabora, Simiyu, Kagera na Mara.

Wamesema katika muda mfupi ambao wameanza kutumia mifumo mbali mbali ya sekta ya umma ukiwemo mfumo wa Epicor, ambao umekuwa na matoleo yaliyotangulia tija na ufanisi imeongezeka katika halmashauri zao.

Miongoni mwa washiriki hao bwana Hussein Yahya, ambaye ni Mhasibu kutoka Halmashauri ya Wilaya ya Tabora, ambaye alisema kuwepo kwa mifumo hii mbali na kuwarahisishia utendaji wao wa kazi inawawezesha kuwahudumia wananchi kwa ufanisi mkubwa.

“Mifumo hii imeongeza uwazi, na uwajibikaji na inaturahisishia katika majukumu yetu ya kutoa huduma kwa wananchi,” alieleza.

Bwana Yahya aliitaja mifumo hiyo kuwa ni pamoja na mfumo wa matumizi (Epicor), Mfumo wa mapato (LGRCIS), Mfumo wa Hospitali wa mapato pamoja na utabibu (GoTHomIS), na mfumo wa mipango na bajeti (PlanReP).

Aliongeza kuwa licha ya mkoa wake wa Tabora kutokuwa miongoni mwa mikoa ya Mradi wa PS3, lakini wamefaidika na mradi huo kwa kupatiwa mafunzo ya Epicor.

Naye bwana Deusderit Binamungu, Afisa Manunuzi kutoka Halmashauri ya Musoma alisema kuwa wamefaidika na mafunzo ya mfumo huo na kubaini kuwa mfumo wa Epicor toleo la 10.2 ni wenye kasi na unaowezesha kupatikana kwa taarifa kwa muda muafaka.

Kwa upande wake Rozalina Tarimo Mkuu wa Kitengo cha Manunuzi kutoka Halmashauri ya Maswa, alisema Mfumo wa Epicor 10.2, ni mzuri kwa kuwa kila mtumiaji wa mfumo atakuwa na namba maalum ya siri hali itakayosaidia kuongeza zaidi usalama wa taarifa na udhibiti wa utoaji taarifa.

“Kuanza kutumika kwa mfumo huu kutasaidia udhibiti wa fedha za umma kutumika kiholela, kabla ya Epicor 10.2 suala la masurufu lilisumbua katika urejeshwaji wake,” alieleza na kuongeza:

“Sheria ya manunuzi namba 7 ya 2011 na marekebisho yake ya 2016, inataka ndani ya siku 14 mtu aliyechukua masurufu awe amerejesha toka siku aliyo maliza kazi, lakini ilikuwa tofauti, ambapo sasa mfumo utakapo anza kutumika, mtumishi hataruhusiwa kuchukua masurufu mapya kabla ya kufanya marejesho ya awali,” alisisitiza.

Mradi wa PS3 ambao unatekelezwa kwa ushirikiano kati ya Serikali ya Marekani na Serikali ya Tanzania kupitia Ofisi ya Rais Tawala za Mikoa na Serikali za Mitaa unalenga kutumia TEHAMA kuboresha uandaaji wa mipango, bajeti na usimamizi wa kifedha kwa kila ngazi ya serikali.

Pia Mradi huo unalenga kuimarisha ufanisi, uwazi na uwajibikaji wa matumizi ya fedha kati ya Mamlaka za Serikali za Mitaa na vituo vya kutolea huduma, kuelekea katika kuboresha huduma za umma kwa wananchi.

Anaandika. Atley Kuni – OR-TAMISEMI