Nitavunja Mabaraza ya Madiwani Yenye Mivutano inayokwamisha Maendeleo’ Mchengerwa

Imewekwa tar.: May 22nd, 2024

Waziri wa Nchi, Ofisi ya Rais Tawala za Mikoa na Serikali za Mitaa, Mhe. Mohamed Mchengerwa amesema atavunja mabaraza ya madiwani yenye mivutano inayokwamisha maendeleo ya wananchi.

Waziri Mchengerwa ametoa kauli hiyo wakati wa kukagua ujenzi wa Hospitali ya Wilaya inayojengwa Kata ya Kibelege katika Halmashauri ya Mji Ifakara na kubaini kuwa imeshindwa kukamilika kutokana na mivutano ya kisiasa uliotokea mara tu fedha za ujenzi wa hospitali hiyo zilipofika.

Amesema mivutano ya kisiasa ya madiwani husababisha miradi mbalimbali ya maendeleo kusimama na kutokamilika kwa wakati na kusisitiza kuwa 

atachukua hatua mara moja ikiwa ni pamoja na kuvunja Baraza la Madiwani la halmashauri husika.

Aidha, Mchengerwa ametumia fursa hiyo kuwaagiza watendaji katika halmashauri nchi nzima kuacha mivutano na wanasiasa na kusababisha ucheleweshaji wa miradi ya maendeleo. 

Amesisitiza kuwa pia itampasa kuwachukulia hatua watendaji hao waliohusika ikiwa ni pamoja na kuwashusha madaraka yao.

"Mnapovutana wanasiasa na watendaji, watendaji wanashindwa kufanya maamuzi, mkifanya hivyo mjue mnawanyima haki wananchi kupata huduma, sasa sitaki kusikia mivutano kwenye mabaraza ya madiwani." 

"Popote nitakaposikia kuna mivutano kama Waziri mwenye dhamana nitavunja Mabaraza ya Mawdiwani kwa maslahi mapana ya wananchi," amesema. 

Waziri Mchengerwa ametumia fursa hiyo kuwakumbusha wakurugezi wa halmashauri zote nchini kushungulikia migogoro inspoibuka kwenye halmashauri zao na kama wameshindwa  kuumaliza anapaswa kutoa taarifa haraka katika Ofisi ya Rais- TAMISEMI. 

" Kunapoibuka migogoro na mivutano wakurugenzi mnapaswa kuishughulikia haraka na mkishindwa basi repoti Ofisi ya Rais-TAMISEMI na sio kukaa kimya na kuendelea kuchelewesha maendeleo kwa wananchi." 

"Mahali popote nitakapobaini naye mtendaji ameshindwa kumaliza mgogoro na hajawasilisha mgogoro huo Ofisi ya Rais Tawala nitamuondoa kwa sababu atakuwa ameshindwa kutumia madaraka yake ipasavyo na hawasaidiii wananchi wa eneo lake," alisisitiza Waziri Mchengerwa.

Awali, Mkuu wa Mkoa wa Morogoro, Mhe. Adam Kighoma Malima alimuomba Waziri Mchengerwa kumaliza mgogoro uliopo uliochangia kutokamilika kwa hospitali hiyo ambayo Serikali imetoa Sh bilioni 1.5 lakini ujenzi umeshindwa na kushindwa kukamilika kwa zaidi ya miaka mitatu iliyopita.

https://www.voiceofbongo.co.tz/2024/05/mabaraza-ya-madiwani-yenye-mivutano.html

https://www.instagram.com/p/C7QyEyzKyol/?igsh=ZzZlNHdyZW9kdWd6

https://www.instagram.com/p/C7Qu28AqQe4/?igsh=eWQ2czk4cmhtZGVp

https://x.com/Jambotv_/status/1793173429429911770?t=agMsDXJ3tIUVv5NIyw1Oyg&s=19