Miradi ya TSCP yachochea uchumi Jiji la Mbeya

Imewekwa tar.: May 10th, 2019

Zaidi ya shilingi bilioni 14 zatumika katika ujenzi wa miundombinu ya barabara  na utengenezaji wa mitaro ya maji ya mvua katika Jiji la Mbeya jambo ambalo limesababisha uboreshaji wa mazingira na kuchochea uchumi wa Jiji  hilo.

Hayo yamesemwa na  Mhandisi wa Halmashauri ya Jiji la Mbeya na Mratibu wa Mradi wa Uimarishaji Miji (TSCP) Bw. Osward Kasambala wakati akitoa maelezo juu ya maendeleo ya Mradi huo kwa timu ya ufuatiliaji kutoka Ofisi ya Rais Tawala za Mikoa na Serikali za Mitaa (OR-TAMISEMI) iliyotembelea jiji hilo kwa lengo la kukagua maendeleo ya miradi iliyo chini ya  mradi wa uimarishaji Miji  Tanzania(TSCP)

Bw. Kasambala amesema Mradi wa Uimarishaji Miji Tanzania umesaidia ujenzi wa Miundombinu katika Jiji la Mbeya kwa kuboresha mazingira, kuongeza kasi ya uchumi, kuwawezesha wananchi kiuchumi na kuongeza Mapato ya Halmashauri ya Jiji hilo.

“Awali miundombinu ya Barabara katika Halmashauri ya Jiji la Mbeya ilikuwa ni vumbi lakini kwa sasa baada ya Mradi wa TSCP kujenga miundombinu hali imekuwa tofauti kwani miundombinu imebadilika na kuwa kivutio kwa wananchi kukuza uchumi wa Jiji la Mbeya” Anafafanua Kasambala

Amesema mara baada ujenzi wa miundombinu ya barabara Halmashauri ya Jiji la Mbeya imeweza kuchochea hali ya uchumi na kuweza kuongeza mapato kutokana na wananchi wengi kuwekeza kwenye maeneo ambayo barabara zimejengwa ukilinganisha na awali ambapo barabara nyingi zilikuwa za vumbi.

Bw. Kasambala amezitaja barabara zilizojengwa chini ya Mradi wa Uimarishaji Mji (Tanzania Strategic Cities – TSCP) katika kipindi cha mwaka 2018/2019  kuwa ni barabara ya MUST yenye urefu wa kilometa 2.7,  barabara  kutoka Ilomba hadi Ivumwe yenye urefu wa kilometa 1.8 na ujenzi wa  Mtaro wa maji ya mvua  wenye urefu wa kilometa 2.8.

Wakati huohuo Bi Debora Mkemwa kutoka Ofisi ya Rais Tawala zaMikoa na Serikali za Mitaa ameupongeza uongozi wa Halmashauri ya Jiji la Mbeya kwa usimamizi wa ujenzi wa miundombinu hiyo na kuwataka kuhakikisha wanakamilisha ujenzi huo kwa wakati na kuzingatia ubora na dhamani ya fedha zilizotolewa kwa ajili ya mradi huo

Aidha  Jiji la Mbeya ni miongoni mwa majiji 5 na Halmashauri 3 ambazo zinanufaika na Mradi wa  uimarishaji wa miji unaosimamiwa na Ofisi ya Rais Tawala za Mikoa na Serikali za Mitaa na kufadhiliwa na Benki ya Dunia.

Na. Angela Msimbira OR-TAMISEMI MBEYA