Mikoa yatekeleza asilimia 49.4 ya Ujenzi wa Viwanda

Imewekwa tar.: March 23rd, 2018

Waziri wa Nchi, Ofisi ya Rais, Tawala za Mikoa na Serikali za Mitaa (TAMISEMI), Selemani Jafo amesema kuwa jumla ya viwanda 1,285 kati ya 2,600 vimejengwa katika mikoa mbalimbali ikiwa ni miezi mitatu tangu atoe agizo la ujenzi wa viwanda 100 kwa kila mkoa.

Akizungumza katika kikao kazi cha kupitia bajeti ya TAMISEMI na Mikoa, kilichofanyika leo mjini Dodoma Jafo alisema viwanda hivyo vilivyojengwa ni sawa na asilimia 49.4.

Alisema agizo hilo bado linaendelea kutekelezwa ambapo hadi kufikia Desemba 31, mwaka huu kila mkoa unatakiwa kuwa na viwanda 100 ambavyo ni sawa na viwanda 2600.

“Viwanda hivi vilivyojengwa vina mchanganyiko mbalimbali ikiwemo viwanda vikubwa, vya kati na vidogo, mna mikakati mikubwa ambayo itawezesha kuwa na mchanganyiko wa viwanda vikubwa na vidogo,”alisema Jafo.

Alibainisha kuwa kupitia wakuu wa mikoa ajenda ya Rais John Magufuli ya Viwanda inatekelezwa na kuwataka waendelee kuitekeleza.

Kwa mujibu wa Waziri Jafo, viwanda vidogo vinavyojengwa ni vile vinavyoanzia sh.milioni 2.5 hadi sh.milioni 10.

Akizungumzia kuhusu maandalizi ya bajeti kwa mwaka huu Waziri Jafo aliwataka Makatibu Tawala wa Mikoa kuhakikisha kuwa wanawapitisha vizuri Wakuu wa Mikoa ili waelewe bajeti za mikoa yao na wahakikishe kuwa randama zinakaa vizuri.

Alisema katika bajeti ya mwaka 2017/18 Ofisi ya Rais TAMISEMI pamoja na Mikoa na Mamlaka za Serikali za Mitaa walitengewa asilimia 20 ya bajeti yote sawa na Trilioni 6.8

Naye Kaimu Katibu Mkuu Ofisi ya Rais TAMISEMI Dkt Zainabu Chaula aliwataka Wakuu wa Mikoa na Makatibu Tawala wa Mikoa kuwa kitu kimoja katika utekelezaji wa shughuli za Serikali ili kuleta ufanisi unaotarajiwa.

Alisema ni vyema viongozi hao hasa Ofisi za Sekretarieti za mikoa kuhakikisha kuwa wanawapa taarifa sahihi Wakuu wa Mikoa ili kurahisisha utendaji wa kazi za serikali.

Awali kabla ya Jafo, Wakuu wa mikoa walitoa taarifa zao za ujenzi wa viwanda hivyo kufuatia agizo alilolitoa ambapo Mkuu wa Mkoa wa Dar es salaam Paul Makonda alisema katika mkoa wake tangu kutolewa kwa agizo hilo viwanda 88 vimejengwa.

Hata hivyo alisema kumekuwepo na changamoto ya umeme na maji na kuiomba serikali kuliangalia suala hilo ili kuendelea kuvutia wawekezaji zaidi.