Serikali yaanza kuandaa Mpango rasmi wa kukabiliana na uhaba wa watumishi

Imewekwa tar.: February 1st, 2022

Na Fred Kibano, Morogoro

Serikali imesema mafunzo juu ya orodha na maelezo ya kazi yatawezesha Mpango wa Serikali wa kupunguza uhaba wa watumishi Serikalini ambao unatokana na kutobainishwa kisayansi bila ya kuangalia uzito wa majukumu ya watumishi kwenye Taasisi za Serikali.

Akifunguzi mafunzo hayo kwa watumishi wa Ofisi ya Rais TAMISEMI mjini Morogoro hivi leo, Katibu Mkuu Ofisi ya Rais Menejimenti ya Utumishi wa Umma na Utawala Bora Dkt. Laurean Ndumbaro amesema uhaba wa watumishi Serikalini kwa sehemu kubwa unatokana na kutobainishwa kisayansi bila ya kuangalia uzito wa majukumu ya watumishi katika Tasisi za Serikali na ndiyo maana Mifumo ya kiutawala imekuwa ikiandaliwa na kutumika kukabiliana na uhaba huo.

Dkt. Ndumbaro amesema kwa muda mrefu Serikali imekuwa ikiweka Mifumo mbalimbali ya kimenejimenti ili kuongeza tija na ufanisi katika utendaji kazi wa kila siku na hivyo zoezi hilo la kuandaa orodha ya kazi kwa wakati huu ni muhimu kwa kila Taasisi ya Serikali.

“Orodha ya kazi ni Mfumo wa Kimenejimenti unaowezesha kuainisha mahitaji kwa idadi na aina ya watumishi, cheo na majukumu yote yanayopaswa kutekelezwa kwa kila mtumishi katika kila cheo kwa mujibu wa muundo na mgawanyo wa majukumu ya Ofisi” alisema Dkt. Ndumbaro.

Aidha, amesema lengo sio kuwapunguza watumishi wa Umma bali ni kuangalia uhaba na upungufu mkubwa wa watumishi kwenye kada mbalimbali na kuweza kupunguza upungufu uliopo kabla ya kuajiri watumishi wengine ili kuboresha utendaji kazi wa shughuli za Serikali katika ngazi zote.

“hii itasaidia kubaini maeneo ambayo yanaupungufu mkubwa wa watumishi kuwa ni kiasi fulani na utoshelevu ni kiasi fulani ili tuweze kuwaondoa wengine kwenye maeneo ambayo wamezidi na kuwapeleka kwenye maeneo ambayo yanakabiliwa na upungufu mkubwa kabla ya kuajiri watumishi wapya” alisema Dkt. Ndumbaro.

Akitoa maelezo ya awali kwa niaba ya katibu Mkuu Ofisi ya Rais TAMISEMI Prof. Rizikiki Shemdoe kabla ya hotuba ya mgeni rasmi, Katibu Tawala Mkoa wa Morogoro Mariam Ntunguja amesema mafunzo hayo yataleta tija kuanzia Ofisi ya Rais TAMISEMI Makao Makuu, Mikoa, Halmashauri na Tasisi zilizo chini ya Ofisi ya Rais TAMISEMI.

“baada ya kukamilika kwa mafunzo haya kazi inayofuata ni kuandaa mahitaji ya watumishi kwenye ngazi ya Wizara, Sekretarieti za Mikoa, Mamlaka za Serikali za Mitaa na Taasisi zilizopo chini ya Ofisi ya Rais Tawala za Mikoa na Serikali za Mitaa” alisema Ntunguja.

Kwa upande wake Mkurugenzi Msaidizi wa Utawala na Rasilimali Watu Bwana Marko Masaya amesema Ofisi ya Rais TAMISEMI inaundwa na vitengo 6 na idara 11 ambapo idadi ya watumishi waliopo makao makuu ni 520 lakini pia kikosi kazi hicho kinawajumbe wapatao 32 hivyo zoezi la kuandaa orodha ya kazi na maelezo yake itasaidia kujua idadi ya watumishi kwa kuzingatia mahitaji halisi ya watumishi kwa kuzingatia muundo wa wizara.

Mwenyekiti wa kikao kazi hicho Bwana Boniface Luhende akiongea kwa niaba ya wajumbe wenzake amesema tangu mafunzo hayo yalipoanza yamekuwa na mafanikio na kwamba wataendelea kupokea maelekezo mbalimbali na kuyafanyia kazi ili kufanikisha azma ya kikao kazi hicho.