Maandalizi ya Uchaguzi Serikali za Mitaa Yaiva – Nyamhanga

Imewekwa tar.: May 29th, 2019

Serikali imesema maandalizi ya uchaguzi wa Serikali za Mitaa Novemba 24, 2019 yanaendelea vizuri na hivyo Mikoa na Halmashauri zote pia zijiandae kikamilifu ili kufanya uchaguzi huo kufanyika vizuri na kuwa wa haki na kidemokrasia.

Kauli hiyo imetolewa na Katibu Mkuu Ofisi ya Rais TAMISEMI Mhandisi Joseph Nyamhanga wakati akiongea na wajumbe wa Kamati Tendaji  ya Wilaya ya Hanang (CHMT) wakati akihitimisha ziara yake ya kikazi wilayani hapo jana.

Mhandisi Nyamhanga amesema kwa hivi sasa Ofisi ya Rais TAMISEMI imekwisha andaa orodha ya Mikoa, Wilaya, Halmashauri, vijiji, vitongoji na mitaa ili kuondoa matatizo madogo madogo yanayojitokeza wakati wa uchaguzi kama ilivyokuwa kwa chaguzi zilizopita na kwamba mwaka 2019 matarajio ni kuondoa kabisa kasoro hizo pamoja na migogoro isiyo na tija.

Aidha, maandalizi ya Mwongozo wa uchaguzi wa Serikali za Mitaa upo tayari, Elimu ya Mpiga Kura na uhakiki wa maeneo ya utawala ikiwa ni pamoja na kumaliza migogoro inayojitokeza katika maeneo yote ya utawala nchini kazi ambayo ikikamilika litatolewa tangazo la Serikali kuhusu maeneo hayo ya utawala.

Nyamhanga amewataka Wakurugenzi wa Halmashauri nchini kufanya maandalizi ya kutosha ikiwa ni pamoja na kuhakiki orodha ya vijiji, vitongoji na mitaa, idadi ya maeneo ya utawala na majina yake kwa sahihi.

Kuhusu migogoro ya maeneo ya utawala, Nyamhanga amesema kuwa ni lazima Mikoa na Halmashauri wamalize migogoro iliyopo ndani ya uwezo wao kama ya wilaya na wilaya, kijiji na kijiji, kitongoji au mtaa na kadhalika ili kuepusha kuvuruga uchaguzi wa Serikali za Mitaa Novemba 24 mwaka, 2019.

Kwa upande wake Mkuu wa Wilaya Hanang alisema kuwa Wilaya ya Hanang inakabiliwa na upungufu wa watendaji wa vijiji wapatao 43 na hivyo kufanya ukusanyaji wa mapato katika vijiji kuwa changamoto kwani wanaokaimu mara nyingi kazi zao haziridhishi kutokana na ubadhirifu wa mara kwa mara unaotokea.

                           Anaandika Fred Kibano