Maafisa Elimu Mikoa na Wilaya watakiwa kutatua kero

Imewekwa tar.: September 19th, 2018

Maafisa Elimu wa Mikoa na Wilaya wametakiwa kutatua kero ndogo ndogo ambazo nyingine zinatakiwa ziishie katika ngazi ya Mkoa au Halmashauri kwa kutatua majibu sahihi ya utatuzi wa kero zao.

Agizo hilo limetolewa jana na Naibu Katibu Mkuu, Ofisi ya Rais Tawala za Mikoa na Serikali za Mitaa bwana Tixon Nzunda wakati akizungumza na maafisa hao kwenye kikao kazi cha siku mbili jijini Dodoma.

Alisema kuwa hakuna sababu kwa mwalimu kulazimika kutafuta msaada wa kero yake nje ya ofisi hizo wakati kero hizo zinaweza kupatiwa majibu na Maafisa Elimu wa Mikoa na Wilaya.

Aidha aliwataka maafisa hao kuhakikisha kuwa wanatoa majibu ya haraka kwa taarifa ambazo zinahitajika na Ofisi ya Rais TAMISEMI ili kuwezesha utekelezaji wa shughuli mbalimbali kwa haraka.

Maagizo mengine yaliyotolewa na bwana Nzunda ni kwa Maafisa hao kuhakikisha kuwa wanasimamia mahudhurio ya wanafunzi na walimu na kuhakikisha walimu wanaingia darasani na kufundisha kikamilifu na kama kutakuwa na mwalimu ambaye hatatimiza wajibu wake, achukuliwe hatua za kinidhamu.

Pia aliwataka kufuatilia upatikanaji wa takwimu sahihi za ElimuMsingi, kwa kuhakikisha kuwa wanapanga ratiba ya kutembelea shule kila siku ili kuwa na ufuatiliaji madhubuti na pia kupata takwimu sahihi kama vile idadi ya madarasa, mabweni, matundu ya vyoo, idadi ya walimu na wanafunzi.

Jambo lingine lililosisitizwa na Naibu Katibu Mkuu ni kwa maafisa elimu hao kuhakikisha kuwa pikipiki 2894 zilizogawiwa kwa Maafisa Elimu kata zinatumika kwa matumizi yaliyokusudiwa ya kuboresha Elimu nchini.

Mbali na maagizo hayo, Maafisa hao wametakiwa pia kuhakikisha kuwa vitabu vilivyosambazwa nchi nzima vinafika shuleni kwa walengwa na vitumike kwa malengo yaliyokusudiwa.

Anaandika Mathew Kwembe, Dodoma