Kahama yajipanga Kufikia Tanzania ya Viwanda

Imewekwa tar.: February 17th, 2020

Serikali imepongeza hatua ya halmashauri ya Mji Kahama kutenga eneo kwa ajili ya wajasiriamali wadogo na kuwamilikisha hati za viwanja ili kuwainua wananchi hao kiuchumi.

Mhandisi Joseph Nyamhanga Katibu Mkuu Ofisi ya Rais TAMISEMI aliyasema hayo mwishoni mwa wiki alipofanya ziara yake ya kikazi  kukagua miradi ya maendeleo na kuona utoaji wa huduma mbalimbali kwa wananchi ikiwa ni pamoja na eneo lililotengwa na halmashauri ya Mji Kahama.

Mhandisi Nyamhanga alisema kutenga eneo kubwa na la kutosha kwa ajili ya wajasiriamali wadogo na wafanyabiashara wakubwa ni dhahiri halmashauri inaunga mkono  Serikali ambayo imeamua kuingia katika Tanzania ya viwanda kwa kuwawezesha wananchi wake kiuchumi na hilo ndilo lengo la nchi.

Aidha, alitoa rai kwa ofisi za Umma wilayani Kahama kununua bidhaa bidhaa za wajasiriamali hao ili kuwainua kiuchumi na kuwajengea uwezo kifedha pamoja na kujiajiri.

Alisema asilimia 10 inayopaswa kutengwa kwa ajili ya akina mama, vijana na watu wenye ulemavu ni jukumu la kila halmashauri kuyabaini makundi haya na kuwapatia mikopo lakini kuhakikisha manarejesho yote ya mikopo yanatekelezwa katika muda uliopangwa ili wengine nao waweze kukopa.

Nyamhanga alisema Sambamba na makundi hayo kufanya biashara na kujiajiri itaongeza mapato ya halmashauri husika na mapato ya Serikali Kuu kwa ujumla.

Aidha, aliuagiza Wakala wa Barabara ‘TARURA’ kujenga barabara inayoelekea katika eneo la viwanda lililotengwa kwa ajili ya wawekezaji wadogo na wakubwa ili kuondoa changamoto ya baadhi ya magari makubwa kushindwa kupita na kushusha mizigo mikubwa.

Anamringi Macha Mkuu wa Wilaya Kahama alisema haikuwa kazi rahisi kuwashawishi na kuwaunganisha vijana na kasha kuwahamisha kutoka katikati ya Mji wa Kahama lakini pia walitatua changamoto ya fedha kwa kuwapatia mkopo wa shilingi milioni 100 na pia kuto na kuwatafutia masoko kwa kutoa rai kwa ofisi zote za Serikali wilayani Kahama kununua samani za ofisi kutoka Y- Times furnature (kiwanda kidogo) lakini pia Taasisi za Serikali zainazohusiana na viwanda zimekaribishwa kuwekeza kwenye eneo la viwanda  ili kuwafundisha vijana na wajasiriamali wengine namna ya kuongeza thamani  ya bidhaa zao na kushindana sokoni.

Richard Sabi kijana mjasiriamali anayemiliki kiwanda cha samani amesema walianza na mtaji mdogo lakini kwa sasa wamekwisha fikisha kiasi cha shilingi milioni 200 baada ya kupata mkopo wa shilingi milioni 100 na kuzalisha. Aidha, alizitaja baadhi ya bidhaa zinazotengenezwa kiwandani hapo kuwa ni pamoja na milango, vitanda, sofa, meza na vitu vingine.  

Mhandisi Nyamhanga pia alitembelea shule ya sekondari Mwakata iliyopo halmashauri ya wilaya Msalala na kituo cha afya Tinde kilichopo halmashauri ya wialaya ya Shinyanga ambapo aliwaasa Viongozi wa wilaya hizo kuongeza kasi ya ujenzi wa miradi ya sekta zote zikiwemo elimu na afya, kufanya kazi kwa weledi lakini pia kusimamia matumizi mazuri ya fedha za Serikali.

                  Anaandika Fred Kibano