Jiji la Tanga lapongezwa kwa miradi bora

Imewekwa tar.: September 3rd, 2018

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo ameipomngeza Halmashauri ya Jiji la Tanga kwa kujenga miradi ya maendeleo yenye viwango vinavyorizisha.

Ametoa pongezi hizo wakati akiwa kwenye ziara  ya kukagua miradi ya maendeleo  inayotekelezwa  chini ya Ofisi ya Rais Tawala za Mikoa na Serikali za Mitaa Jijini Tanga

Mhe. Jafo ametembelea ujenzi wa Dampo la kisasa linalojengwa kwa Sh.Bilioni 9, uboreshaji wa kituo cha afya cha Mikanjuni kinacho gharimu sh.Milioni 400 pamoja kiwanda cha kufyatua matofali cha halmashauri ya Jiji kilichogharimu Sh.milioni 80.

Amempongeza Mkurugenzi wa Halmashauri ya Jiji la Tanga Bw. Daudi Mayeji kwa kusimamia kazi kwa weledi mkubwa hasa katika  usimamizi wa miradi ya maendeleo inayojengwa kwa ubora mkubwa.

Aidha, Mhe. Jafo amemmwagia sifa Mkurugenzi huyo kwa ubunifu mkubwa wa kuanzisha kiwanda cha kisasa cha matofali kinachotumia teknolojia ya kisasa zaidi ambacho kinauwezo wa kufyatua matofali zaidi ya 5000 kwa siku ambapo hadi sasa wameshapata tenda ya kutengeneza matofali 100,000 kutoka kwa kampuni moja pekee huku makampuni mengine na wananchi wa kawaida wakimiminika kiwandani hapo kutaka matofali kutokana na ubora mkubwa wa matofali hayo.

Mhe. Jafo amewataka Wakurugenzi wa Halmashauri nyingine hapa nchini kuiga mfano kutoka katika Jiji la Tanga  hasa kwa usimamizi mzuri wa  vyanzo vya mapato ili kuziongezea mapato Halmashauri zao.