Jafo awajia juu Jiji la Arusha; Ni kuhusu uboreshaji wa Kituo cha Afya Kaloleni

Imewekwa tar.: September 15th, 2018

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani  Jafo ameutaka  uongozi wa Jiji la Arusha kuacha mara moja mpango wake wa kutaka kubadilisha matumizi ya Tsh Mil.400 fedha ambazo zilitolewa na Serikali kwa ajili ya Ukarabati wa Kituo cha Afya Kaloleni, na badala yake uongozi  ulitaka kuzipeleka katika kituo cha Afya Moshono.

Mhe.Jafo alitoa agizo hilo jana, wakati alipofanya ziara ya kutembelea jiji hilo ambapo alieleza kutokubaliana na mpango wa uongozi wa jiji la Arusha na hivyo akasisitiza kuwa fedha hizo zitumike kuboresha Kituo cha Afya Kaloleni kama maagizo ya awali yalivyokuwa.

“Fedha hizi zimeletwa kwa Makusudi Maalumu na  mimi nakifahamu kituo hiki cha Kaloleni najua mahitaji yake sasa mnapotaka kuhamisha fedha hizi na kuzipeleka Moshono siwaelewi”

Pamoja na kuwataka wataalamu hao wa jiji la Arusha kuzingatia maelekezo ya serikali kwenye matumizi ya fedha za serikali pia alisisitiza umuhimu kwa watendaji hao kuhakikisha kuwa wanafanyakazi kwa bidii katika kuwahudumia wananchi ili kupunguza msongamano wa wagonjwa.

Mhe.Jafo ambaye alifanya ziara katika kituo hicho kwa ajili ya kujionea kama kweli fedha hizo alizoagiza zitolewe katika kituo hicho zimeshaanza kutumika na kubaini tangu Juni 26 mwaka huu fedha hizo zilipotolewa hadi sasa hakuna ukarabati wowote uliofanyika.

Naye Mganga Mkuu wa Jiji la Arusha, Dkt, Simon Chacha alikiri ni kweli fedha hizo zililetwa na walitaka kuzipeleka kituo cha Afya Moshono lakini kwa maagizo ya Waziri Jaffo watajenga jengo la X-Ray, sehemu ya kusubiria wagonjwa (waiting bay), jengo la kufuatilia na kukarabati chumba cha meno, dawa, maabara na mfumo wa maji taka.