Jafo ataka afua za lishe kuwa agenda ya kudumu

Imewekwa tar.: August 24th, 2019

Waziri wa Nchi Ofisi ya Rais Tawala   za Mikoa na Serikali za Mitaa Mhe. Selemani Jafo amewaagiza Wakuu wa Mikoa  na Makatibu Tawala  wote nchini kuhakikisha wanasimamia  utekelezaji  wa afua za lishe  kwenye Mikoa na Mamlaka za Serikali za Mitaa ili jamii  iweze kupata huduma  bora  na kuondokana na  hali duni ya lishe nchini.

Ameyasema hayo wakati akifungua Mkutano wa tathmini ya tatu ya utekelezaji wa Mkataba wa Lishe   nchini uliofanyika katika ukumbi wa Mikutano wa hazina, jijini Dodoma.

Mhe. Jafo amesema kuwa lishe bora ni nguzo muhimu yenye kuleta jamii yenye afya bora ambayo huchangia kwa kiasi kikubwa ukuaji wa uchumi na maendeleo ya nchi.

Amesema  utekelezaji wa mkataba na usimamizi  wa shughuli za lishe unahitaji  kusimamiwa na Mikoa lengo likiwa ni Halmashauri  ziweze  kutekeleza  na kuboresha huduma  za lishe  kwa wananchi wote ili  kuchangia utekelezaji wa azma ya Serikali  kuelekea Tanzania ya Viwanda na Uchumi wa kati ifikapo 2025.

Mhe. Jafo ametoa mwezi mmoja kwa  Wakuu wa Mikoa  na Wilaya na Wakurugenzi wa Halmashauri  zote nchini  kuhakikisha wanasaini  mikataba  wa lishe  kwa watendaji Kata na Vijiji   ili kurahisisha utekelezaji wa afua za Lishe Nchini.

Amewaagiza Waganga Wakuu wa Mikoa na Wilaya  kuhakikisha wanasimamia  watoto wenye utapiamlo nchini wanapatiwa foliki asidi  pamoja na chakula dawa  kwa ajili ya matibabu  ili kunusuru  maisha ya watoto  hhawa ambao ni tunu  ya Taifa.

Aidha, Mkurugenzi wa Idara ya Sera na Uratibu wa shughuli  za Serikali  kutoka Ofisi ya Waziri Mkuu Bw. Paul Sangawe amesema kuwa mkataba wa lishe  umeongeza uwajibikaji  wa masuala ya lishe nchini  na  na kuchangia  utapiamlo aina ya udumavu wa kuendelea  kushuka kutoka  asilimia 34.7 mwaka 2014 hadi asilimia 31.8 mwaka 2018.

Na. Angela Msimbira OR-TAMISEMI