Jafo agoma kuiongezea shilingi milioni 200 Halmashauri ya Jiji la Dodoma

Imewekwa tar.: November 4th, 2019

Waziri wa Nchi, Ofisi ya Rais Tawala za Mikoa na Serikali za Mitaa, Mhe. Selemani Jafo amekataa kuiongezea Halmashauri ya Jiji Dodoma kiasi cha shilingi milioni 200 kwa ajili ya kumalizia ujenzi wa shule ya mfano na kuagiza kuwa ujenzi wa shule hiyo uwe umekamilika ifikapo Novemba 30 mwaka huu.

Ameyasema hayo leo kwenye ziara yake ya kikazi ya kukagua ujenzi wa Shule Mpya ya Msingi ya mfano inayojengwa katika Kata ya Ipagala, Halmashauri ya Jiji la Dodoma.

Mhe. Jafo ametoa   msimamo huo baada ya kupewa taarifa ya ujenzi wa shule hiyo na kuwa bado zinahitajika takribani sh milioni 241.931 ili kukamilisha ujenzi huo.

 “Inanipa tabu kuelewa kuwa ujenzi huu haujakamilika na mnataka fedha zaidi wakati mlipewa kiasi cha shilingi 706,400,000 na wezenu kupitia fedha hizo wameweza kukamilisha ujenzi na tayali shule zimeanza kufanya kazi” Amesema Mhe. Jafo

Mhe. Jafo ameutaka uongozi wa Jiji hilo kutafuta  fedha sehemu nyingine ili kukamilisha ujenzi  wa shule hiyo ya mfano na kuhakikisha wanakamilisha ujenzi kwa muda unaotakiwa kwa kuwa Serikali hapo tayari  kuongeza fedha ili kukamilisha ujenzi huo

“Naomba niwaeleze kwamba hiyo fedha shilingi milioni 200 haitaweza kupatikana kutoka ofisini kwangu, lakini hata mkitoa kwenye vyanzo vya ndani ni kujitia hasara isiyokuwa na sababu kwani kama mliona gharama ya ujenzi ni kubwa mlitakiwa kuona, hata mkajenga madarasa 12 kati ya hayo 17 lakini yawe yamekamilika kuliko hali ilivyo sasa, inamaana bila kuongeza hizo fedha mradi huu hautaisha” Amesisitiza Mhe. Jafo.

Aidha Mhe. Jafo ametoa wito kwa Hamashauri ya Jiji la Dodoma kuhakikisha wanasimamia ujenzi  kikamilifu  ili kuweza kukamilika kwa muda unao takiwa na ujenzi huu kuwa katika ubora unaoendana na kiasi cha fedha kilichotolewa  na Serikali.

Akitoa taarifa, Afisa Elimu Msingi wa Halmashauri ya Jiji la  Dodoma Bw. Charles Mabeho amesema  awali walipokea sh milioni 706.4 kwa ajili ya ujenzi wa shule hiyo na kuwa mpaka sasa tayari zimetumika shilingi  milioni 677.4 na kubakiwa na shilingi  milioni 29, fedha ambazo hazitaweza kukamilisha ujenzi wa shule hiyo.

Kutokana na hali hiyo, Mkuu wa Mkoa wa Dodoma, Dk Binilith Mahenge amekiri kuwa uongozi wa Halmashauri ya Jiji la Dodoma umeteleza katika utekelezaji wa ujenzi huo ila kupitia muda waliyopewa watajipanga vyema kuhakikisha ujenzi huo unakamilika katika ubora unaohitajika na kuendana na gharama za fedha zilizotolewa na Serikali.

" Hii ni sawa na mradi wa hospitali ya Uhuru, makadilio yalikuwa ni kujenga kwa sh bilioni 6, na Rais ametoa Shilingi bilioni 3.4 na baada ya kukubaliana mapema wataalamu walikaa na kupanga upya na sasa inajengwa kwa fedha iliyopo, hivyo tunaomba radhi." Amesema Mhe. Mahenge

Wakati huohuo Mkurugenzi wa Halmashauri ya Jiji la Dodoma Bw.  Godwin Kunambi amesema ofisi yake itaangalia namna ya kutoa fedha hizo katika mapato ya ndani ili kuhakikisha ujenzi huo unakamilika kwa wakati.

"Kwenye bajeti yetu tuna mapato ya ndani takribani shilingi bilioni 8, hivyo tutatoa kiasi hicho kwa ajili ya kumalizia ujenzi huo”. Amesisitiza Kunambi

Aidha, Jafo amewaagiza kuhakikisha ifikapo Novemba 30 shule hiyo iwe inekamilika na kuhakikisha wameiweka katika mazingira ya wanafunzi kujifunza.

Na Angela Msimbira OR-TAMISEMI