IMARISHENI USIMAMIZI MFUMO WA GoT-HoMIS

Imewekwa tar.: November 25th, 2022

OR -TAMISEMI

Uongozi wa Hospitali ya Halmashauri ya Wilaya ya Serengeti imetakiwa kuimarisha usimamizi katika  mfumo wa ukusanyaji mapato  GoT-HoMIS    ili kudhibiti upotevu wa fedha na  kuboresha  utoaji wa huduma za Afya  katika hospitali hiyo.

Wito huo umetolewa na timu ya usimamizi shirikishi kutoka Idara ya Afya Ofisi ya Rais Tawala za Mikoa na Serikali  Novemba 24,2022  baada ya  kubaini kuwa bado kuna changamoto katika ukusanyaji wa mapato kwa kutumia mfumo wa GoT-HoMIS kitendo ambacho kinapelekea upotevu  wa mapato.

Akiongea  kwa niaba ya  timu ya usimamizi shirikishi, Mkurugenzi wa Idara ya Huduma za Afya, Lishe na Ustawi wa Jamii Ofisi ya Rais Tawala za Mikoa na Serikali za Mitaa  Dkt. Ntuli Kapologwe  ametoa wito kwa uongozi huo kushughulikia changamoto zilizopo  ikiwemo changamoto ya ukosefu wa kompyuta.

" Ukususanyaji wa mapato hapa unasuasua tuna mfumo wa GoT-HoMIS  kwanini tusiwekeze nguvu huko,  mfumo huu ni mzuri sana katika kudhibiti mianya ya upotevu wa fedha, amesisitiza Dkt. Kapologwe

Kwa upande mwingine timu ya usimamizi shirikishi kutoka OR-TAMISEMI imempongeza mganga mfawidhi wa kituo cha afya Natta kilichopo katika Halmashauri ya Wilaya ya Serengeti  kwa kusimamia vizuri  ukusanyaji wa mapato  na kupelekea makusanyo ya kituo hiko  kupanda kutoka Sh. laki nne hadi kufikia Sh. Mil 3 kwa mwezi.

Naye Mganga Mfawidhi wa Kituo cha afya Natta Dkt. Juma  Kipingu amesema kuwa ukusanyaji wa mapato kwa kutumia mfumo wa GoT-HoMIS  imesaidia kudhibiti upotevu  wa mapato ambayo yametumika katika kuboresha miundombinu ya kutolea huduma za afya,kulipa stahiki za watumishi  pamoja na kukarabati  majengo ya kituo hiko.