Halmashauri Nchini zapokea Magari 50 ya Wagonjwa.

Imewekwa tar.: March 20th, 2018

Waziri wa Nchi Ofisi ya Rais TAMISEMI, Selemani Jafo, ameendesha zoezi la kugawa magari 50 ya  wagonjwa aina ya Suzuki Maruti (Ambulances) kwa Mamlaka za Serikali za Mitaa nchini.

Magari hayo ambayo awali Rais wa Jamhuri ya Muungano wa Tanzania, Mhe. Dkt. John Pombe Joseph Magufuli aliagiza yafanyiwe utaratibu wa kisheria wa kiforodha na  yagawanywe kwenye Mamlaka za Serikali za Mitaa ili yatumike kwa kuwahudumia wananchi katika vituo mbalimbali vya afya nchini.

“Hii ni agenda ya Mhe. Rais ya kutaka kuhakikisha watanzania wanapata huduma bora, ambulance hizi ulaji wake wa mafuta ni mdogo sana na zitatusaidia katika halmashauri nyingi”

Mhe. Jafo amemshukuru Mhe. Rais kwa kuonyesha mapenzi makubwa  lakini pia amependezwa na Watumishi wa Wizara, Mikoa na Halmashauri zote kuweza kuhudhuria hafla hiyo muhimu iliyofanyika katika eneo la bandarini Jijini Dar es Salaam.  

Kwa upande wake Naibu Katibu Mkuu anayeshughulikia Afya Ofisi ya Rais TAMISEMI, Dkt. Zainabu Chaula amemshukuru Waziri wa Nchi na Waheshimiwa Wabunge kwa utendaji wao na kuwaomba wabunge kuwa na lugha ya ufahamu unaoafanana ili kuboresha utendaji wa Serikalini.

“kwa niaba ya watendaji nawashukuru sana waheshimiwa Wabunge, nilitamani tutembee pamoja kwa maana ya kuwa na uelewa wa pamoja  na ndio maana Mhe. Waziri amewakabidhi wabunge magari nao watukabidhi sisi”

Akizungumza katika hafla hiyo, Kamishna wa Mamlaka ya Mapato  Tanzania (TRA) Charles Kichere, amesema awali magari hayo aliyaona Mhe. Rais alipofanya ziara bandarini na kwamba magari hayo yalikuwa yameteleekezwa na wamiliki wake kutofahamika na ndipo aliagiza kufuata utaratibu wa forodha na kuyataifisha magari hayo na kisha yagawiwe kwenye Mamlaka za Serikali za Mitaa nchini.

Kwa upande wake Mhe. Prof Norman Sigalla King, Mbunge wa Makete, amemshukuru Mhe. Rais kwa kutoa ambulance hizo kwa ajili ya kuimarisha huduma za mama wajawazito.

“kwanza nitoe shukrani za pekee kabisa kwa kupewa ambulance kwa ajili ya wilaya yangu ya Makete nakumbuka niliomba kwa ajili ya tarafa za Ukutama, Matamba, Magomba, Tulongwa na Niwaho” amesema umbali wa kata ya Ukutama hadi Makete mjini ni kilomita 70 na hivyo itawanusuru wakina mama dhidi ya vifo vya uzazi visivyotarajiwa.

Kaimu Mkurugenzi Halmashauri ya Wilaya Kigoma, Hakimu Ndatama amemshukuru Mhe. Rais kwa kuwapatia ambulance ambayo itaokoa vifo vya akina mama na watoto kwa kiasi kikubwa.

Kutolewa kwa magari hayo kwa Mamalaka za Serikali za Mitaa ni sehemu ya kuimarisha huduma za afya nchini.

                    Baadhi ya magari aina ya Suzuki Maruti ambayo Mhe. Rais Dkt. John Pombe Joseph Magufuli 

                      aliamuru yagawiwe katika Mamlaka za Serikali za Mitaa ili kuhudumia Sekta ya Afya nchini