FAINALI MCHEZO WA BAISKELI YAIPA NAFASI TAMISEMI

Imewekwa tar.: October 9th, 2022

Na. Asila Twaha, Tanga

Timu ya kuendesha baiskeli  wavulana  TAMISEMI imeibuka nafasi ya 11 kati ya washiriki 31 fainali ya mashindano ya Shirikisho la Michezo ya Wizara, Idara za Serikali na Mikoa (SHIMIWI).

Mchezo huo uliochezwa Oktoba 9, 2022 mapema asubuhi kwa mbio za kuendesha baiskeli kuanzia katika Kijiji cha Mambolea Halmashauri ya Wilaya ya Muheza  hadi  katika uwanja wa Mkwakwani Halmashauri ya Jiji la Tanga.

Mshiriki wa Timu ya TAMISEMI Joseph Masalu amesema, mbio hizo alizokimbia kilomita 50  kwa muda wa saa moja na dakika 17  zimempa uzoefu wa  mashindano na kupata nafasi kwa kujipanga kuendelea kufanya mazoezi zaidi ili kuweza  kufanya vizuri  katika mashindano mengine.

Akielezea nguvu na uwezo mdogo iliyonayo baiskeli yake amesema, hata hivyo anamshukuru Mungu  kwa kadri alivyoweza kupambana na kuweza kupata nafsi ya 11 kati ya washiriki 31.

“Ninaishukuru sana Ofisi yangu na viongozi wote kwa kuweza kunipa nafasi kushiriki michezo ya SHIMIWI katika nafasi ya kuendesha baiskeli ninawaomba viongozi wetu waendelee kutuunga mkono na kutuwezesha vifaa vya mashindano ili kuweza kufanya vizuri zaidi” amesema Masalu

Ameongeza kuwa yeye mwenye atakuwa  ni balozi mzuri wa kuweza kuwahamasisha watumishi wa Ofisi ya Rais – TAMISEMI kuweza kushiriki michezo na hasa katika mchezo wa kuendesha baiskeli.

Kwa upande wa timu ya wanawake kuvuta kamba TAMISEMI imeendelea kuonesha maajabu yake  katika mechi iliyochezwa leo  na  kuwafunga 2-0 timu ya Tume ya Taifa ya Uchaguzi na TAMISEMI kuingia katika hatua ya robo fainali.