DKT. MSONDE ASISITIZA MATUMIZI YA VISHIKWAMBI KWA WALIMU

Imewekwa tar.: July 9th, 2023

Naibu Katibu Mkuu, Ofisi ya Rais TAMISEMI (Elimu), Dkt. Charles Msonde amewataka Maafisa Elimu Kata  kuwasimamia na kuwasidia walimu namna kutumia vishikwambi walivyopewa kuwezesha ufundishaji na ujifunzaji ili kuinua ubora wa elimu nchini.

Dkt. Msonde ametoa maelekezo hayo wakati akifunga mafunzo endelevu ya walimu kazini (MEWAKA) kwa Maafisa elimu kata 1,209  yaliyofanyika katika chuo cha Ualimu Klerruu Mkoani Iringa.

Dkt. Msonde amesema Mheshimiwa Rais Dkt. Samia Suluhu Hassan anaendelea kuimarisha utendaji kazi wa walimu nchini kwa kuwatekelezea masuala mbalimbali ikiwa ni pamoja na kuwapatia walimu vishikwambi hivyo ili kuimarisha ufundishaji na ujifunzaji.

“Kupitia mafunzo haya ya MEWAKA mmefundishwa namna mnavyopaswa kutumia vishikwambi katika ufundishaji na ujifunzaji, hivyo nitoe rai kwenu kuhakikisha vinatumika ipasavyo kuinua ubora wa Elimu nchini”

Amewataka kutumia vishikwambi hivyo kuingia katika Maktaba Mtandao na Mfumo wa Kujifunza (LMS) wa Taasisi ya Elimu Tanzania ili kujipatia vifaa vya kufundishia na kujifunzia pamoja na mbinu mbalimbali za ufundishaji na ujifunzaji.

Aidha, Dkt. Msonde amewata Maafisa Elimu Kata kusimamia kikamilifu vituo vya walimu na kuvitumia kuendesha mafunzo ya walimu kazini  ili kuimarisha ufundishaji na ufundishaji.

“Kupitia mafunzo haya mtayafahamu vema majukumu yenu hivyo kahakikisheni vituo vya walimu vinatumika kuendesha mafunzo ya walimu kazini kama ilivyokusudiwa” Dkt. Msonde amesisitiza.

Aidha, amewata Maafisa Elimu Kata kuwa  chachu ya kuendeleza na kusimamia Mafunzo Endelevu ya Waalimu Kazini (MEWAKA) ili kuboresha ujifunzaji kwa wanafunzi wa Elimu Awali na Msingi.

Amesema katika mwaka huu wa fedha 2023/24 Serikali imejipanga kuendelea kutoa mafunzo kazini yatakayoimarisha  ufundishaji na ufunzaji na itaendelea kuimarisha utoaji wa Mafunzo Endelevu ya Walimu Kazini  kwa njia ya TEHAMA.

Naye, Mratibu wa Mafunzo kutoka Wizara ya Elimu, Sayansi na Teknolojia, Huruma Elias amesema Mafunzo hayo yameudhuriwa na Maafisa Elimu Kata 2,384 ambapo katika Kituo cha Chuo cha Ualimu Klerruu jumla ya Maafisa Elimu kata 1,209  wameudhuria na katika Chuo cha Butimba  Maafisa Elimu Kata 1,175 wameudhuria mafunzo hayo.