Chandarua Pekee Hakiondoi Malaria – Dkt. Kapologwe

Imewekwa tar.: October 26th, 2020

Na. Fred Kibano, Dodoma

Serikali imetoa wito kwa Wadau wa Sekta ya afya nchini kuhakikisha wanatumia njia mbambali za kukijinga na malaria badala ya kutumia njia moja ya chandarua ambayo pekee haiwezi kuondoa malaria na kufikia malengo ya Taifa katika kutokomeza malaria.

Hayo yamesema na  Mkurugenzi wa Idara ya Afya, Ustawi wa Jamii na Lishe Ofisi ya Rais TAMISEMI Dkt. Ntuli Kapologwe wakati akifungua kikao kazi cha afya chini ya T-MARC Tanzania kwa Wadau wa malaria ambao ni Ofisi ya Rais TAMISEMI, Wizara ya Afya na Ustawi wa Jamii, Jinsia, Wazee na Watoto, T-MARC Tanzania na baadhi ya asasi zilizopo kwenye baadhi ya mikoa Jijini Dodoma leo.

Dkt. Kapologwe amesema Wadau wote waige mfano wa asasi ya T-MARC Tanzania (T-MARC) Shirika lisilo la Kiserikali linalofanya kazi ya kuboresha afya ya jamii na kusaidia maendeleo yao ambao wameweza kutumia njia mbalimbali katika kudhibiti malaria kama vile upulizaji wa madawa ya kuangamiza viluwiluwi vya Mbu Kwenye Mazalia, kuwajengea uwezo jamii katika kupima malaria wapatapo dalili za malaria, kutumia chandarua chenye dawa na njia nyingine.

Amesema kuna tabia ya baadhi ya Wadau kufanya kazi za malaria nchini lakini kazi yao kubwa ni kugawa vyandarua ambavyo haviwezi kuondoa malaria kwa asilimia mia moja.

Aidha,amewataka Waganga Wakuu wa Mikoa ya Shinyanga na Simiyu kuhakikisha halmashauri zao zinazotekeleza mradi wa malaria chini ya program ya T-Marc Tanzania zinaendeleza mradi huo kwenye halmashauri nyingine ambazo hazina mradi huo kwa kutenga fedha kwenye bajeti zao.

“sisi kama Serikali kwa maana ya mikoa na Mamlaka za Serikali za Mitaa tuhakikishe program za kudhibiti malaria zinaingia katika bajeti zetu”, alisema Dkt. Kapologwe.

Awali Bwana Hamid Alway Meneja Mkuu wa Mradi T-MARC Tanzania amesema kama ulivyo Mpango wa Taifa wa kudhibiti malaria wa mwaka 2014 hadi  2020 lengo la T-MARC Tanzania ni kusaidia kupunguza malaria nchini kutoka asilimia 7.3 ya 2017 hadi asilimia 1 ifikapo mwaka 2020 ambapo T-MARC wametoa vyandalua vyenye dawa, kujenga tabia ya kupima malaria, kuboresha utoaji wa huduma za afya kwa  wahudumu wa afya na kuzuia malaria hasa kwa akina mama wajawazito.

Bwana Hamidu Alway amesema maeneo yanayotekeleza mradi huo wa malaria unaoisha mwezi Oktoba, 2020 ni Shinyanga halmashauri za Ushetu na Msalala na halmashauri zote za mkoa Simiyu ambapo kiwango cha maambuzi ya malaria kimepungua.

Kazi nyingine zilizotekelezwa ni kutoa mafunzo kwa Wahudumu wa afya ya Jamii ngazi ya vijiji na mitaa, kutumia vyombo vya habari vya redio na machapisho kuelimisha jamii na kutoa pampu na dawa za kuuwa vijidudu vya malaria kiasi cha lita 2,340.

Naye Stella Kajange Mratibu wa Mradi wa malaria na Wadudu Wadhirifu Ofisi ya Rais TAMISEMI amesema wizara itahakikisha vipaumbele vya mikoa vinatekelezwa na Wadau na sio kujichagulia maeneo ambayo hayana tija kwa mikoa.

Kwa upande wake Dkt. Dismas Charles Mratibu wa Mradi wa Kudhibiti Malaria kutoka wizara ya Afya amesema umwagaji wa dawa kwenye mazalia ya mbu unagharamiwa na Serikali kwa asilimia 100 ikiwa ni pamoja na njia sahihi za kutumia kuangamiza mazalia ya mbu hivyo halmashauri zinapopanga bajeti ziingize bajeti za madawa hayo.  

Bwana John Duttu Mratibu wa malaria halmashauri ya wilaya Ushetu amesema kutokana na mradi wa T-MARC Tanzania amefaidika na mafunzo ya upimaji wa maji juu ya kuangamiza viluwiluwi vya mbu kwenye mazalia, kuwapa mafunzo wahudumu wa afya kwenye vijiji na mitaa wilayani ijapokuwa changamoto inayowakabili ni uhaba wa wahudumu wa afya kutokana na umbali wa kijiji na kijiji.