Bajeti TAMISEMI Yapita kwakishindo

Imewekwa tar.: April 17th, 2018

Wabunge wa Bunge la Jamhuri ya Muungano wa Tanzania  wamepitisha bajeti ya Wizara ya TAMISEMI kwa kauli moja mara baada yakuwasilishwa na Waziri mwenye dhamana na OR TAMISEMI Mhe. Suleman Jafo na Wabunge hao kuchangia kwa hoja tofauti tofati katika maeneo ya vipaumbele vya Wizara kwa Mwaka wa fedha wa 2018/19.

Mara baada ya kupitishwa kwa bajeti hiyo, Katibu Mkuu Ofisi ya Rais TAMISEMI Mhandisi Mussa Iyombe, amekaa meza moja na Wataalam kutoka ngazi ya Wizara, Mikoa na Mamlaka za Serikali za mitaa kwa ajili yakuwashukuru wanatimu waliokuwa wakifanya uchambuzi wa Bajeti ya Mamlaka za Serikali za Mitaa kwa ufanisi kwa muda wa siku 60

Katibu Mkuu Iyombe akizungumza katika kikao hicho, amewataka watenadaji hao kuongeza morali kwani wameifanya Wizara kuwa kinara katika suala zima la utendaji huku akiwaomba kuendeleza njia waliyo ionyesha na kuwa mfano kwa  Wizara zingine za Serikali.

“Mmefanya njia moja nzuri sana, inaheshima, mmeonyesha kwamba ninyi ni watumishi wa umma, mliotukuka, kitu kinachotambulika na wengi wakiwepo Wabunge, na kufanya Bungeni Mkashangiliwa na watu wote hata Zitto Kabwe” Amesema Katibu Mkuu Iyombe.

Katibu Mkuu kipekee ameipongeza Idara ya TEHAMA ya Wizara kwa kazi walioifanya katika kuusanifu mfumo na kwakuwa zoezi la Bajeti kwa Mwaka wa 2018/19 kwa ngazi za Mamlaka za Serikali za Mitaa limefanyika kwa mfumo wa Kieletroniki wa Planrep iliyoboreshwa na hivyo kufanya zoezi hilo kuwa lakwanza kufanyika nala kwa umahiri wa hali ya juu.

Akishukuru kwaniaba ya jopo hilo, Mkurugenzi wa Idara ya Tawala za Mikoa OR TAMISEMI, Beatrice Kimoleta, alisema mbinu kubwa waliyoifanya kufikia na kuhitimisha bajeti za Mammlaka za Serikali za Mitaa mitaa ni pamoja na Umoja, Heshma na Mshikamano ndio vilikuwa ngao kuu za utekelezaji wa majuku hayo waliyokuwa wamekabidhiwa na Wizara.

Kwa Upande wake Mkurugenzi wa Bajeti wa Wizara OR TAMISEMI John Cheyo  amemuahidi Katibu Mkuu kuwa watafanya vema katika bajeti ijao kwakuwa katika awamu ya sasa ilikuwa ni mara ya kwanza kutumia mfumo huo wa Planrep iliyoboreshwa .

“Mhe. Katibu Mkuu, Tulikuwa na changamoto ndogondogo wakati wa uchambuzi hasa ikizingatiwa kuwa mfumo ni mpya, hivyo tukuahidi kuwa katika mwaka ujao wa fedha zoezi hili litakuwa jepesi na la ufanisi zaidi kwakuwa tayari tumeshapata uzoefu wakutosha" amesema Cheyo.

Suala la maandalizi ya mipango na bajeti kwa njia ya kielektroniki ni utekelezaji wa agizo la Waziri Mkuu wa Jamhuri ya Muungano wa Tanzania, Mheshimiwa Kassim Majaliwa Majaliwa (Mb)  wakati akizindua mfumo wa PlanRep iliyo boreshwa, ambayo ilisanifiwa na wataalam wazawa, siku ya tarehe 5 Septemba, 2017 ili kuondokana na matumizi makubwa ya rasilimali muda, fedha pamoja na shajala ambazo zilikadiriwa kufikia wastani wa Shilingi bilioni 4 kila mwaka.

Timu ya wataalam 65 kutoka Makao Makuu Ofisi ya Rais TAMISEMI, Mikoa na Halmashauri imefanikiwa kukamilisha uchambuzi wa bajeti za Halmashauri 185 za Tanzania Bara kwa njia ya Kielektroniki kwa mwaka wa fedha 2018/19. Bajeti hiyo inakadiriwa kufikia wastani wa Shilingi trilioni 6

Anaandika   Atley Kuni- OR TAMISEMI