Shilingi Mil. 553.8 zakopesha vikundi vya wanawake, vijana na walemavu Mkuranga

Imewekwa tar.: April 8th, 2021

Na Honorata Minde, Mkuranga

Halmashauri ya Wilaya ya Mkuranga Mkoani Pwani imetumia jumla ya Shilingi Mil. 553.8 kukopesha vikundi vya wanawake, vijana na walemavu Mkuranga katika kipindi cha mwaka wa fedha 2019/20. 

Mkurugenzi Mtendaji wa halmashauri hiyo Mhandisi Mshamu Munde amesema fedha hizo zimetolewa kwa vikundi vya wanawake, vijana na walemavu katika halmashauri hiyo ikiwa ni asilimia 10 ya mapato ya ndani ya halmashauri hiyo.

Miongoni mwa vikundi vilivyonufaika na mikopo hiyo ni kikundi cha Bodaboda kutoka kijiji cha Mkuranga ambapo kupitia Katibu wake Rajabu Mustafa amekiri kupokea shilingi milioni tatu na baada ya kuzirejesha walikopeshwa tena shilingi milioni sita ambazo walizitumia kununulia pikipiki mbili.

Mustafa amesema sasa kikundi chake chenye wanachama 12 kinakamilisha marejesho na kuanza kuomba tena miioni 25.6 ambazo wamepanga kuongeza pikipiki kumi hatimaye malengo yao ya kujikwamua na umasikini yatimie.

Akizungumzia faida wanayopata wanakikundi Mustafa amesema wameweza kusomesha Watoto wao hadi elimu ya sekondari kununua viawanja na kujenga nyumba huku akiomba umri wa vijana waongezewe hadi miaka 40 ili kuimarisha uaminifu

Kwa upande wake mwenyekiti wa kikundi cha wanawake “kujikwamua”chenye wanachama saba Recho Shani amesema mkopo waliopata toka Halmashauri sh. Milioni tatu wameongeza vitendea kazi na kuendeleza mradi wao wa ushonaji nguo kuuza majora na vitenge kwenye minada mbali mbali ingawa wameweka bayana changamoto ya ukosefu wa soko huku akiwaomba wataalamu wa halmashauri wamsaidie hatimaye wapige hatua kimaendeleo