Serikali Yataka Matokeo Chanya Mfumo wa Ugavi na Usambazaji Dawa

Imewekwa tar.: September 11th, 2018

Katibu Mkuu Ofisi ya Rais, Tawala za Mikoa na Serikali za Mitaa (OR - TAMISEMI), Mhandisi Mussa Iyombe, amewataka wadau wa afya wanaofanya kazi chini ya Mamlaka ya Serikali za Mitaa kufuata utaratibu uliowekwa katika kutekeleza majukumu yao.

Mhandisi Iyombe ameyasema hayo leo jijini Dodoma, wakati akifungua kikao cha siku moja kilichowakutanisha Wizara ya Afya, Jinsia, Wazee na Watoto, Wadau mbalimbali wa afya (eneo la Mfumo wa Ugavi na Usambazaji Dawa nchini) pamoja na Wakurugenzi na Wakuu wa Idara kutoka Ofisi ya Rais - TAMISEMI.

Amewataka Wadau hao kuwa na malengo yanayoendana na OR - TAMISEMI, ikiwa ni pamoja na kufanya kazi kwa kushirikiana, kukaa pamoja na kupanga mikakati ambayo itatoa mwelelekeo ambao utampa kila mmoja dira ya majukumu yake ili kuepuka muingiliano wa kazi .

Amesema lengo la kuishirikisha Ofisi ya Rais - TAMISEMI ni kufanya kazi zenye ufanisi zitakazoleta matokeo chanya kwa wananchi na kuepuka kurudia kufanya makosa kama yaliyotokea hapo awali ambapo fedha nyingi za wafadhili zilipotea pasipokuwa na matokeo chanya.

“Kuna wakati unakuta Wadau wanafanya kazi fulani, na sisi tunafanya kazi hiyo hiyo, tunapaswa tugawane cha kufanya ili wananchi wapate huduma bora, tumekaa miaka mingi, tumetoa pesa nyingi, lakini wananchi hawaoni matokeo yoyote, tuna mikakati mizuri lakini hakuna matokeo chanya” Alisema Mhandisi Mussa Iyombe.

Hata hivyo, Katibu Mkuu Mhandisi Iyombe alimtaka Naibu Katibu Mkuu (AFYA) Ofisi ya Rais - TAMISEMI Dkt. Zainab Chaula kukaa na Wadau hao mara kwa mara kwa lengo la kuwapa miongozo wa nini kinatakiwa kufanyika ili kuacha kurudia makosa yaleyale kama ilivyokuwa hapo awali.

Kwa upande wake Dkt. Zainab Chaula amewataka Wadau hao wa afya kufanya kazi kwa kuzingatia Ilani ya Chama cha Mapinduzi (CCM) ambayo inatoa dira ya nini serikali inataka kifanywe, kwa kuzingatia pia suala la afya ni kipaumbele namba moja katika Ilani hiyo.

“Tumeitana hapa ili tutembee pamoja, tufanye kazi kwa utaratibu uliowekwa, ili wananchi wapate mabadiliko waliyoyataka, Ilani ndiyo nyenzo ya kufanyia kazi, kila mmoja atembee nayo aisome, Serikali inafanya kazi na kila mdau lakini kwa kufuata utaratibu uliowekwa” Alisisitiza Dkt. Chaula.

Ofisi ya Rais – TAMISEMI, Wizara ya Afya Jinsia, Wazee na Watoto pamoja na Wadau hao wa Mfumo wa Ugavi na Usambazaji dawa katika Sekta ya afya wamekubaliana kutekeleza mambo muhimu ya afya ambayo Serikali imeyapa kipaumbele ili kuboresha afya ya Watanzania.

     Anaandika Zulfa Mfinanga na Magdalena Dyauli