Maafisa Uuguzi na Ukunga waaswa kusimamia maadili na nidhamu ya kazi

Imewekwa tar.: March 21st, 2024

Na. Fred Kibano, Dodoma

Dkt. Rashid Mfaume Mkurugenzi wa Idara ya Afya, Ustawi wa Jamii na Lishe Ofisi ya Rais TAMISEMI akimwakilisha Waziri wa Nchi Ofisi ya Rais - TAMISEMI Mhe. Mohamed Mchengerwa, amewaagiza Maafisa Uuguzi na Ukunga Viongozi nchini kuimarisha nidhamu kwa kuwachukulia hatua watumishi wanaokiuka miiko ya kazi.

Dkt. Mfaume ametoa kauli hiyo wakati akifunga kikao kazi cha siku tatu kwa Maafisa Uuguzi na Ukunga nchini kilichpofanyika katika ukumbi wa PSSSF Jijini Dodoma tarehe 20 Machi, 2024 na kuwataka watendaji hao kufanya kazi kwa kuzingatia maadili na miiko ya ukunga na uuguzi.

“nasisitiza na kuwaelekeza kuhakikisha, mnaimarisha usimamizi wa huduma za afya na rasilimali na msisite kuchukua hatua za kinidhamu dhidi ya wote watakaobainika kwenda kinyume na maadili ya kitaaluma na kwa wale wote wanaofanya ubadhirifu wa mali za Umma” alisema Dkt. Rashid Mfaume.

Amesisitiza pia kuhakikisha wanakwenda kutumia maarifa na uzoefu walioupata katika mkutano huo na kuimarisha utekelezaji wa majukumu yao pamoja na kuimarisha utawala bora na uwajibikaji katika kuinua kiwango cha huduma za afya nchini.

Katika hatua nyingine Dkt. Mfaume akimwakilisha Mhe. Mchengerwa amemwelekeza Mkurugenzi wa huduma za Uuguzi na Ukunga Tanzania Bi Ziada Sellah kusimamia utoaji wa huduma staha na mawasiliano madhubuti ili kuondoa changamoto ya utoaji wa huduma staha na mawasiliano madhubuti baina ya mteja na mtoa huduma kwani imekuwa ikisababisha malalamiko kutoka kwa wananchi. 

Kwa upande wake Bi. Ziada Sellah Mkurugezi wa Huduma za UUguzi na Ukunga Tanzania na Muuguzi Mkuu wa Serikali amesema kwa kipindi cha mwaka 2022/2023 Idara ya UUguzi na Ukunga ilifanya tathmini ya utoaji wa huduma kwa wananchi katika hospitali za Wilaya na Mikoa ambapo asilimia 29 ya huduma ilikuwa kwa huduma za uuguzi na ukunga asilimia 53 lakini baada ya kuwajengea uwezo watendaji wa kada hiyo kwa mwaka 2023/2024 huduma za uuguzi ilipanda hadi kufikia asilimia 66 na upande wa ukunga ilipanda hadi kufikia asilimia 75. 

Naye Bwana Alex Baluhya Rais wa Chama cha Wauguzi Tanzania ameiomba Serikali kushughulikia muundo wa kiutumishi wa kada ya wauguzi na wakunga kwani Muundo wa Utawala wa Ofisi ya Rais-TAMISEMI hauwatambui Wauguzi Viongozi, Muundo wa Maendeleo ya Utumishi wa Umma wa kada za Uuguzi na Ukunga na kumba kama itawezekana waongeze sehemu ya Uuguzi na Ukunga ili kuboresha utendaji na maslahi yao kwani pamoja na kuwa wamejiendeleza katika ngazi tofauti za elimu hakuna utaratibu madhuti wa kuwapandisha vyeo na mishahara yao.

Bwana Ahmed Chibwana Mwenyekiti wa Wauguzi Wakuu wa Mikoa Tanzania Bara amesema wamekubaliana na kumeazimia kuimarisha usimamizi wa huduma za mama na mtoto katika vituo vya kutolea huduma za afya kupitia matiumizi sahihi na tafsiri sahihi ya grafu za uchungu pamoja na kuimarisha uratibu wa ukaguzi wa kamatibabu wa huduma za uuguzi na uchungu (clinical audit).

Mkutano huo hufanyika kila mwaka kwa lengo la kutathimini na kujadili ubora wa huduma za afya zinazotolewa na Wauguzi na Wakunga nchini kwa lengo la kupata fursa ya kubadilishana maarifa na uzoefu katika utekelezaji wa shughuli zao katika kusimamia utoaji wa huduma za afya katika ngazi zote nchini, Kauli mbiu ya Mkutano huo ni “Huduma staha na mawasiliano Madhubuti ni wajibu wa kila mtoa huduma”