Jafo awahimiza maktari kudumisha upendo na amani

Imewekwa tar.: October 30th, 2018

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amewataka madaktari kujenga umoja, mshikamano na kudumisha amani katika utendaji kazi wao ili kutoa huduma bora kwa wananchi maskini.

Ameyasema hayo wakati wa kuwapongeza wataalam wa afya waliotoa huduma ya afya kwa wananchi wa Halmashauri ya Wilaya ya Mpwapwa leo kwenye ukumbi wa Landmark uliopo Jijini Dodoma.

Mhe. Jafo amesema madaktari wanatakiwa kujenga upendo, amani na mshikamano baina yao kwani kwa kufanya hivyo kutasaidia kunyakazi kwa weledi na kuweza kutoa huduma bora kwa jamii.

“Endeleeni kuwa na upendo, shikamaneni na jengeni umoja wenu ili kuweza kuwahudumia wananchi maskini wanaohitaji huduma bora za afya” anasema Mhe. Jafo.

Amesema kuwa mahali popote pasipokuwa na upendo kazi haiwezi kufanyika kwa weledi unaotakikana hivyo ni vyema Madaktari wakachukua muda mwingi kujenga upendo katika kazi zao.

Mhe. Jafo amewashukuru madaktari hao kwa kujitoa katika utoaji wa huduma kwa jamii na kuonyesha umuhimu wa kuwadumia wananchi wenye uhitaji kwa gharama nafuu.

“Serikali inatambua na kudhamini mchango wenu wa kujitoa kuwahudumia wananchi maskini jambo ambalo mmeonyesha uzalendo na nchi yenu asanteni sana, “Anasema  Jafo

Aidha Mhe. Jafo amewataka kutoa huduma kama hizo katika mikoa mingine kwa kuwa watu bado wanahitaji huduma hiyo ya afya ambayo ni muhimu kwa jamii.

Naye Rais Mstaafu wa Chama cha Madaktari Tanzania Bw. Obadia Nyongole amesema katika kutoa huduma za afya Halmashauri ya Wilaya ya Mpwapwa wameweza kuona wagonjwa 2769 na 255 waligundulika na matatizo na kuweza kufanyiwa upasuaji na kuweza kukusanya damu lita 159.