Halmashauri zapigwa marufuku kukopa Benki

Imewekwa tar.: November 29th, 2019

SERIKALI imetoa siku saba kwa wakurugenzi wa halmashauri kuwasilisha taarifa za mikopo waliyokopa kwenye taasisi za kifedha kugharamia miradi ya maendeleo baada ya kubainika ukiukwaji wa agizo lililotolewa Desema 13 mwaka juzi, kupiga marufuku halmashauri kukopa fedha benki.

Kadhalika, imeziagiza halmashauri zilizochukua mikopo na bado fedha hazijatumika, kurudisha fedha hizo mara moja na mkurugenzi atakayebainika kuficha taarifa hizo atachukuliwa hatua za kinidhamu.

Agizo hilo la serikali limetolewa jijini hapa na Waziri wa Nchi, Ofisi ya Rais, Tawala za Mikoa na Serikali za Mitaa (TAMISEMI), Selemani Jafo, ambapo alisema imebainika baadhi ya wakurugenzi wanakwenda kinyume na agizo la Serikali la kutowaruhusu kuchukua mikopo benki.

“Serikali ilitoa maelekezo kupitia mamlaka za serikali za mitaa, halmashauri zisichukue mikopo kwenye benki za kibiashara kwa lengo la kutekeleza miradi mbalimbali. Agizo hilo lilitolewa Desema 13 mwaka 2016 na Katibu Mkuu Hazina, kupitia barua yenye kumbukumbu namba CBC.155/233/101,” alieleza.

Waziri Jafo alibainisha kuwa licha ya agizo hilo la Serikali lakini imebainika baadhi ya wakurugunzi kupitia vikao vya Baraza la madiwani, wanakopa fedha kwenye benki za kibiashara kinyume cha maelekezo ya serikali.

Kwa sababu hiyo, Jafo ametoa siku saba kuanzia jana hadi Jumatano ya wiki ijayo kwa halmashauri zote kupitia wakurugenzi kuwasilisha taarifa za mikopo waliyokopa ambapo timu ya wataalam itachambua kisha kutoa mapendekezo kwa serikali.

“Mkurugenzi akibainika kachukua mkopo halafu hajawasilisha taarifa sahihi, atachukulia hatua na katika hili hata waliohamishwa ikibainika walichukua mikopo bila kufuata taratibu wataitwa kujibu tuhuma,” alieleza.

Alisema agizo hilo linakwenda pamoja na kupiga marufuku halmashauri kukopa fedha kwa ajili ya kugharamia miradi mbalimbali na vitendo hivyo kuanzia sasa havitavumiliwa.

Juzi, akiwa kwenye ziara yake Bukombe, mkoani Geita, Rais John Magufuli, alipiga marufuku halmashauri kukopa fedha kwenye taasisi za kibenki kwa lengo la kugharamia miradi ya maendeleo.

Rais Magufuli alisema mikopo hiyo imekuwa mzigo kwenye halmashauri kutokana na deni kulipwa kwa viwango vikubwa vya riba.

Mwisho.