FAINALI YA RIADHA YATAMBA TABORA, MIKOA YAIBUKA KIDEDEA

Imewekwa tar.: August 14th, 2022

OR - TAMISEMI

Baadhi ya fainali za riadha  zimefanyika  leo  Agosti 14, 2022 katika mashindano ya Michezo kwa Shule za Sekondari  2022 ( UMISSETA) yanayoendelea Mkoani Tabora.

Kwa  upande  wa mbio za Mita 3000 Wasichana  Neema Nyaisawa ametetea ubingwa wa Mkoa  wa Mara kwa   kutumia   dakika 10 :20:25  ukifuatiwa na Mkoa wa Mwanza  ambapo  Levina Malogwa alikimbia kwa  dakika 10:36:07 huku  Zaituni Ally kutoka   Mkoa wa Manyara akiibuka mshindi wa tatu kwa kukimbia kwa dakika 10:39:28.

Kwa upande wa Wavulana   Mshiriki Damian  Christian amepeleka kombe Arusha kwa kutumia dakika 8: 49:50 kumaliza mzunguko, nafasi ya pili ikishikiliwa na  Samson Sangatiti kutoka Mara aliyekimbia kwa dakika 9:01:88 huku Mezikioli Emmanuel kutoka Manyara akiwa mshindi wa tatu katika  kukimbia dakika 09: 01:97.

Mbio za mita Mita 100 , kwa upande wa  wanafunzi  Wavulana wenye mahitaji maalum mbio hizo zimefanyika katika makundi mawili, kundi la kwanza limeongozwa na  Baraka stephan kutoka Mwanza kwa kukimbia kwa dakika 0:12:40 akifuatiwa na Sheria  Choma  kutoka Kagera aliyekimbia kwa dakika 01:12:56 huku  Shaibu George kutoka Njombe akitwaa ubingwa mshindi wa tatu kwa kukimbia dakika 01:12:57.

Kwa upande wa wanafunzi wasichana wenye mahitaji maalum  Mkoa wa Mwanza umeibuka kidedea kupitia  Edina Lubanza ambae alikimbia kwa dakika 0:15:18  akifuatiwa na  Salma  Mohamed kutoka Mtwara aliyekimbia kwa dakika 01:15:62 huku  Mkoa wa Iringa ukiibuka mshindi wa tatu kupitia  Witnes Kasilo aliyekimbia kwa  dakika 0:16:10.

Kwa upande wa wavulana  mita 200 wanafunzi wenye mahitaji maalum  Shaibu George kutoka Njombe ameongoza Jahazi la kundi la kwanza  kwa kukimbia kwa dakika 0:26:75 akifuatiwa na Sheria  Chomi kutoka Kagera kwa kukimbia kwa dakika 0:26:80 huku  Silvanus Deus kutoka Kagera akishikilia nafasi ya mshindi wa tatu kwa kukimbia kwa dakika 0:26:88.

Katika kundi la pili  Japhary Ally kutoka  Njombe  ameibuka kidedea kwa kumaliza mzunguko kwa kutumia  dakika 0:26:50,nafasi ya pili imenyakuliwa na  Lamnyeki Loshiro kutoka Kilimanjaro kwa kukimbia kwa dakika 0:26:65, huku Masanja Daudi kutoka Arusha akishikilia nafasi ya tatu  kwa kukimbia kwa dakika 0:32:10.