Waziri Mkuu akemea tabia ya uharibifu wa miundombinu ya barabara

Imewekwa tar.: October 19th, 2018

Mwandishi wetu, Bahi

Waziri Mkuu wa Jamhuri ya Muungano wa Tanzania Mhe. Kassim Majaliwa amezindua daraja la Chipanga na kuagiza waharibifu wa miundombinu ya barabara kukamatwa na kufikishwa mahakamani ili kudhibiti tabia iliyoibuka ya baadhi ya watu kung'oa alama za barabarani.

Akizindua daraja la Chipanga wilayani Bahi akiwa ziarani wilaya humo akikagua miradi mbalimbali ya Maendeleo, Mhe Majaliwa amesema kumekuwa na tabia ya watu wasio waaminifu ya kuharibu miundombinu ya barabara na kingo za madaraja jambo ambalo linapaswa kukemewa.

Aliwataka wananchi wa Chipanga kuhakikisha kuwa kila mmoja anakuwa mlinzi wa mwenzake lakini pia Jamii ya eneo hilo kuunda vikundi vya ulinzi ili viweze kuwakamata wahalifu hao wa miundombinu ya barabara na madaraja na kuwafikisha mahakamani.

"Kumeibuka tabia ya watu wachache wasiokuwa na nia njema,wanang'oa alama za barabarani na kingo za madaraja ,vitendo hivi vinasababisha ajali, hao ni watu wasiopenda Maendeleo watolewe taarifa,wakamatwe, wafikishwe mahakamani na tutawafunga,” alisema Waziri Mkuu.

Awali akikagua ujenzi wa nyumba ya walimu yenye uwezo wa kuishi walimu sita katika shule ya sekondari Mpalanga, Mhe. Majaliwa amepongeza ujenzi wa nyumba hiyo na kuahidi kuwa serikali itaendelea kutatua kero zinazowakabili walimu huku akiagiza wilaya hiyo kujenga shule ya msingi kila Kijiji.

Akimkaribisha Waziri Mkuu kuzindua daraja hilo, Waziri wa Nchi, Ofisi ya Rais, Tawala za Mikoa na Serikali za Mitaa Mhe Selemani Jafo amesema tayari Serikali imetoa sh. billioni 2.18 kwa ajili ya ujenzi wa daraja hilo na mkandarasi tayari ameshalipwa Sh.Bilioni 2.14.

Alisema kabla ya ujenzi wa daraja hilo, kulikuwa na athari nyingi kwa wananchi ikiwemo kukata mawasiliano baina ya wananchi wa upande mmoja na Halmashauri ya wilaya ya Bahi na hivyo kukosa huduma muhimu waliokuwa wakizihitaji ikiwemo watoto kushindwa kwenda shule.

Alisema awali wakati wa ujenzi unaanza kulikuwa na changamoto mbalimbali ikiwemo mkandarasi kushindwa kuendana na kasi iliyotakiwa lakini baadaye walienda sawa na hatimaye daraja limezinduliwa.

Kadhalika, alisema serikali imetoa Sh.Bilioni 1.5 kwa ajili ya ujenzi wa vituo Vya Afya vitatu Vya Wilaya hiyo na Sh.Bilioni 1.5 zitapelekwa Mwaka huu wa fedha kwa ajili ya ujenzi wa Hospitali ya wilaya.