Vikundi 13 Wilayani Kibaha vyanufaika na mikopo ya sh milioni 46

Imewekwa tar.: February 25th, 2021

Na Ruth Msechu, Pwani

Jumla ya vikundi 13 vya wanawake, vijana na walemavu katika halmashauri ya wilaya ya Kibaha mkoani Pwani vimenufaika na mikopo isiyo na riba yenye thamani ya shilingi milioni 46.3 inayotokana na mapato ya ndani ya halmashauri hiyo.

Mojawapo ya vikundi vya wanawake vilivyowezeshwa ni Jawaba ambacho kina wanachama watano na kilipata mkopo wa shilingi milioni tano.

Kupitia mkopo huo kikundi kilianzisha biashara ya kuuza mchele,kufuga kuku wa kisasa ambapo wana  jumla ya kuku 100 pamoja na kutengeneza sabuni za maji.

Wanakikundi hawa wanasema kupitia miradi waliyoanzisha wameweza kuwalipia watoto wao ada za shule na kuwapatia huduma za msingi.

Kikundi kingine cha  wanawake kilichofaidika na mkopo ni kikundi cha  Mshikamano kinachojishughulisha na ubanguaji wa korosho na uuzaji wa korosho na kupewa mkopo usio na riba wenye thamani ya shilingi milioni nne.

Kikundi kingine cha vijana kilichonufaika na mkopo kutoka Halmashauri  ni Pande group kilichopo Bokomnemela, kikundi hiki kilipata mkopo wa shilingi milioni nne na kina wanachama watano wanaojishughulisha na mradi wa steshenari pamoja na saluni ya kiume.

Katibu wa kikundi hiki Ramadhani Bakari Msusa anasema kupitia mkopo huu wameweza kuboresha biashara yao kwa kuongeza vitendea kazi kama mashine ya kutolea kopi kwani mwanzo hawakuwa nayo, wameweza kuongeza mashine moja ya kunyolea pamoja na printa.

Aidha, Halmashauri ya Wilaya ya Kibaha imeendelea kuwawezesha watu wenye ulemavu kwa kuwapatia mkopo wenye masharti nafuu. Kwa mwaka wafedha 2018/ 2019 halmashauri iliwezesha vikundi 10 vya watu wenye ulemavu kiasi cha shilingi milioni 22.5 kutokana na kutokuwepo na vikundi vingi vya watu wenye ulemavu halmashauri haikuweza kutoa mkopo kwa mwaka wa fedha 2019/2020.

Kwa mwaka wa fedha 2020/2021 halmashauri ya wilaya ya Kibaya imetenga jumla ya shilingi milioni 159.7 kwa ajili ya mikopo ya wanawake, vijana na watu wenye ulemavu.