SUMA JKT yaagizwa kufanyakazi saa 24 ujenzi wa Hospitali Uhuru

Imewekwa tar.: January 25th, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe Selemani Jafo amemuagiza Mkandarasi SUMA JKT kuhakikisha wanafanya kazi saa 24 ili kukamilisha ujenzi wa Hospitali ya Uhuru inayojengwa katika Halmashauri ya Wilaya ya Chamwino, Mkoani Dodoma.

Ameyasema hayo leo alipokuwa kwenye ziara yake ya kikazi ya kukagua maendeleo ya ujenzi wa Hospitali hiyo ambayo inatarajiwa kukamilika mwezi Mei, 2020.

Amefafanua kuwa lengo la ujenzi wa Hospitali hiyo ni kusaidia kutoa huduma bora za afya na kuwapunguzia wananchi  umbali kutembea muda mrefu kufuata huduma hizo, hivyo ni wajibu wa mkandarasi kuhakikisha  ujenzi huo unakamilika kwa wakati na kwa viwango vinavyokubalika Serikalini.

Mhe. Jafo ameuagiza uongozi wa Halmashauri ya Wilaya ya Chamwino kuhakikisha wanasimamia ujenzi huo kwa weledi, ili gharama zitakazotumika ziendane na majengo yanayojengwa na ujenzi huo unakamilika kwa wakati uliopangwa.

 “Mkuu wa Mkoa na Viongozi wote wa Halmashauri hakikisheni kuwa vifaa vinapatikana kwa wakati na  mnasimamia  kila wakati na kila hatua  ili kuhakikisha  ujenzi huo unakamilika” Amesisitiza Mhe. Jafo

Amewataka viongozi hao kuhakikisha vifaa vinapatikana kwa wakati ili mkandarasi asipate shida kukamilisha ujenzi wa Hospitali hiyo katika kipindi  kilichopangwa na

Aidha Hospitali ya Uhuru inajengwa katika Halmashauri ya Wilaya ya Chamwino, Mkoani Dodoma na inategemewa kugharimu shilingi    bilioni 3.99. fedha za Ujenzi zilitolewa na Rais wa Jamhuri ya Muungano wa Tanzania Mhe. John Pombe Magufuli, fedha ambazo zilitakiwa kutumika katika sherehe za maadhimisho ya siku ya uhuru wa Tanganyika Disemba, 9 mwaka 2018, ambazo zilitolewa na Kampuni ya simu ya Air tel kama gawio.