Serikali yataka Halmashauri ya Njombe kuongeza kasi ujenzi wa hospitali

Imewekwa tar.: May 3rd, 2019

Na Mathew Kwembe, Njombe

Serikali imeutaka uongozi wa Halmashauri ya Wilaya ya Njombe kuongeza kasi katika ujenzi wa majengo yake saba ya Hospitali mpya ya Halmashauri hiyo ambapo, majengo sita kati ya saba yapo katika hatua ya msingi.

Akizungumza na Uongozi wa Timu ya Uendeshaji Huduma za Afya ya Halmashauri ya Wilaya hiyo na Mkoa wa Njombe ambao, kwa pamoja walitembelea eneo la Matembwe lililopo umbali wa kilometa 65 kutoka Mji wa Njombe, Naibu Katibu Mkuu Ofisi ya Rais Tawala za Mikoa na Serikali za Mitaa anayeshughulikia Afya Dkt. Dorothy Gwajima amesema kuwa, ukiacha jengo la kutoa huduma za vipimo vya mionzi, majengo mengine yote sita bado yapo katika hatua ya msingi na ya umwagaji wa zege na hatua hii ni kinyume na kasi ya matarajio ya Serikali kuwa, majengo yote yawe yamekamilika ifikapo tarehe 30 Juni, 2019.

Kufuatia hali hiyo, Dkt Gwajima amemtaka Meneja wa TARURA anayesimamia ujenzi huo Mhandisi Samson Kalesi kuhakikisha kuwa anamsimamia mkandarasi anayejenga majengo hayo ili aongeze idadi ya mafundi ukilinganisha na waliopo sasa kwa ajili ya kuongeza kasi ya ujenzi wa majengo hayo na kuhakikisha yanakamilika mapema kama ilivyokusudiwa.

Dkt. Gwajima ameiagiza Halmashauri kuhakikisha kila wiki iwe inampatia taarifa za ujenzi wa hospitali hiyo ikiwemo picha zinazoonesha hatua iliyofikiwa kwa kila jengo. Aidha, ameagiza kuwe na daftari la taarifa fupi ya ujenzi uliofanyika kila jengo kila siku na taarifa hiyo itumwe pamoja na picha za majengo hayo. Aidha, ameagiza sambamba na kitabu cha Wageni na Viongozi wanaotembelea mradi huo pia, kuwe na daftari linalorekodi maelekezo na ushauri uliotolewa ili, kuweka kumbukumbu nzuri za ushiriki wao katika kufuatilia utekelezaji wa mradi huo.

Vilevile, Dkt Gwajima ameagiza Halmashauri kuhakikisha Kamati zote za Usimamizi wa Ujenzi huo zinafanya Vikao na kutunza muhtasari zote ili, kila inapohitajika kumbukumbu hizo zipatikane. Aidha, amesisitiza kuwa, katika Vikao hivyo uwakilishi wa wataalamu wa afya uzingatiwe ili, waweze kutoa ushauri wao kwa ajili ya kuwezesha kuepuka kasoro za kujenga bila kuzingatia ubora wa maeneo ya kitaalamu kwa kuwa katika huduma za hospitali kila eneo lina kanuni zake mahususi. Dkt. Gwajima amezitaja Kamati hizo kuwa ni Kamati ya Ujenzi, Manunuzi ya vifaa na Mapokezi ya Vifaa.

Pia, Naibu katibu Mkuu amesisitiza umuhimu wa majengo hayo kujengwa katika ubora unaotakiwa kwa kuzingatia ramani “DMO (Mganga wa Wilaya) hakikisha majengo yote saba yanajengwa katika ubora unaotakiwa, na kuepuka kuanza kufanya marekebisho kutokana na kukosekana kwa ufuatiliaji wa kitaalamu wakati wa ujenzi“ amesema Dkt Gwajima.

Kwa upande wake Mhandisi Kalesi amemhakikishia Naibu Katibu Mkuu kuwa, pamoja na uwepo wa changamoto kadhaa walizopitia wakati wa utekelezaji wa mradi huu, atahakikisha wanazingatia maelekezo yote aliyowapa na kuongeza kasi ya ujenzi. Aidha, Dkt. Gwajima ameupongeza Uongozi wa TARURA kwa kushirikiana katika utekelezaji wa mradi huu na kuziba pengo la upungufu wa Wahandisi licha ya majukumu makubwa waliyonayo. Aidha, Dkt. Gwajima ametambua ushirikiano huu na kusisitiza uendelee katika halmashauri zote wanazotekeleza miradi kama hii.

Mapema akisoma taarifa ya ujenzi wa Hospitali hiyo, Mganga Mkuu wa Halmashauri ya Wilaya ya Njombe Dkt Deusdedit Kalaso amemweleza Naibu Katibu Mkuu kuwa halmashauri hiyo imepokea fedha kiasi cha shilingi bilioni 1.5 kwa ajili ya ujenzi ambapo majengo yaliyopendekezwa kujengwa kwa fedha hizo ni pamoja na jengo la utawala, wagonjwa wa nje, stoo ya dawa, maabara, vipimo vya mionzi, jengo la kufulia nguo na jengo la huduma ya uzazi. Dkt Kalaso ameongeza kuwa, kufikia sasa halmashauri imetumia shilingi milioni 418.4 ambayo ni sawa na asilimia 28 ya matumizi ya fedha yote ya mradi na kwamba, hivi sasa taratibu za manunuzi ya vifaa vya ujenzi zinaendelea kwa kutumia fedha iliyobaki.

Wakati huo huo Naibu Katibu Mkuu, Ofisi ys Rais Tawala za Mikoa na Serikali za Mitaa anayeshughulikia afya Dkt Dorothy Gwajima jana alipata fursa ya kutembelea Kituo cha Afya Lupembe kilichopo katika Wilaya ya Njombe na kujionea hali ya utoaji huduma. Akiwa katika kituo hicho, Dkt. Gwajima amesikitishwa na hali isiyoridhisha ya mazingira ya kituo ikiwemo hali ya usafi na uwajibikaji kwa ujumla ambapo, amezitaka timu za usimamizi na uendeshaji wa huduma za afya mkoa na halmashauri (RHMT na CHMT) kutekeleza jukumu lao la kufuatilia na kusimamia mwenendo wa utoaji huduma huduma katika vituo vya afya na kuleta mabadiliko ya uwajibikaji vinginevyo, wazembe atawaondoa katika majukumu ya uongozi maana inaonekana hawatumii muda wao kufuatilia hali ya huduma katika vituo.

Kufuatia hali hiyo, Naibu Katibu Mkuu ameitaka RHMT na CHMT husika kujitathmini juu ya utendaji wao kwani kituo hicho kipo karibu zaidi na ofisi zao na kungekuwa na fursa kubwa zaidi ya kuwezesha ufuatiliaji lakini sivyo ambavyo imekuwa.

Aidha Dkt Gwajima alipata fursa ya kuongea na baadhi ya wateja waliokuwa kituoni ambao, nao walitoa maoni na kero zao ikiwemo hali duni ya usafi, majibu yasiyo rafiki ya watoa huduma na ukosefu wa baadhi ya dawa. Vilevile, Dkt. Gwajima alifanya mapitio ya takwimu mbalimbali za huduma ambapo baadhi ya aliyobaini kwa ufupi ni pamoja na uzembe katika ufuatiliaji wa wagonjwa hususan siku za mwisho wa wiki na mapumziko ya kazi, ukosefu wa baadhi ya vipimo na ukosefu wa kumbukumbu stahiki za dawa.

Dkt. Gwajima ameagiza maboresho katika kituo hicho yafanyike mara moja na kwamba, mapungufu anayokutana nayo katika vituo ni madogo na ambayo alishayatolea maelekezo na yalitakiwa kubainiwa na timu husika za usimamizi na uendeshaji huduma za afya katika mkoa na halmashauri husika.

Dkt. Gwajima amesema, kwa ujumla timu za usimamizi na uendeshaji huduma za afya mikoa na halmashauri (RHMT na CHMT) zikumbuke kuwa, ubora wa huduma za afya katika vituo ndiyo kioo pekee cha uwajibikaji wao hivyo, wajipange kuhakikisha wanatumia nguvu zaidi na muda zaidi kwa ajili ya ufuatiliaji wa huduma.

Aidha, Dkt. Gwajima amesema, timu itakayobainiwa kushindwa kufuatilia mwenendo wa utoaji huduma katika vituo na kuchukua hatua itambue kuwa, timu hiyo itakuwa imepoteza sifa za kuendelea na majukumu ya uongozi.