Serikali yakerwa na kasi ndogo ya ujenzi wa daraja la mto Ng’ombe Halmashauri ya Manispaa ya Kinondoni

Imewekwa tar.: August 15th, 2020

Katibu Mkuu Ofisi ya Rais Tawala za Mikoa na Serikali za Mitaa  Mhandisi  Joseph Nyamhanga  ameiagiza Kampuni ya ujenzi ya China Henan International Corporation Group Co. Ltd (CHICO) anayejenga  Daraja la mto  ngombe eneo la sinza  kuhakikisha anakamilisha ujenzi kwa wakati ili kuwaondolea adha wananchi wa eneo hilo

Ametoa agizo hilo leo wakati akikagua miradi ya maendeleo   inayotekelezwa na Halmashauri ya Manispaa ya Kinondoni, Jijini Dar-es-salaam

Nyamhanga amesema kuwa kasi ya ujenzi wa daraja la mto huo ni ndogo  kwani hadi sasa ujenzi umekamilika kwa asilimia 40, hivyo amemuagiza mkandarasi  CHICO kuhakikisha anakamilisha ujenzi huo kwa wakati

Amefafanua kuwa faida za ujenzi wa daraja hilo ni  kuondoa  tatizo la mafuriko  ambalo lilikuwa likiwasumbua wakazi wa eneo hilo na maeneo jirani hivyo kucheleweshwa kwakwe  kunasabisha adha kubwa kwa wananchi hasa katika kipindi cha mvua,

Ameendelea kufafanua kuwa mradi ulitakiwa kukamilika tarehe 16 Septemba, 2020, hivyo mkandarasi aongeze kasi  kuhakikisha anakamilisha katika muda uliopangwa  kwani kutokukamilishwa kwa wakati kwa mradi huo  serikali haitasita kumkata  faini kwa kutokukamilisha mradi huo kwa wakati.

Amewaagiza Wakala wa Barabara, Mijini na Vijijini (TARURA),Halmashauri ya  Manispaa ya Kinondoni, Mkuu wa Mkoa wa Dar-es-salaam kuahakikisha wanasimamia kwa karibu mradi huo ili uweze kukamilika kwa kwa wakati ili kuwapunguzia adha wananchi kuzunguka

“Ili kupunguza kero kwa wananchi ni vyema wakandarasi wakahahihisha wanakamilisha ujenzi kwa wakati, niwatake Halmshauri ya Manispaa  ya Kinondoni kuhakikisha hawaongezi muda” Amesisitiza Mhandisi Nyamhanga

Aidha. amesema Serikali ya awamu ya tano chini ya uongozi wa Rais wa Jamhuri ya Muungano wa Tanzania Mhe. John Pombe Magufuli  imetoa zaidi ya  shilingi  bilioni 731 kwa ajili  ya kuendeleza  miundombinu katika Jiji la Dar-Es-Salaam  yakiwemo  masoko, mifereji ya maji ya mvua  na barabara kwa lengo la kuboresha jiji hilo

Naye Meneja wa TARURA Halmashauri ya Manispaa Kinondoni Mhandisi Leopord Runji amesema ujenzi wa daraja la mto Ngombe lina urefu wa kilometa 7.6 hadi sasa mkandarasi ameshakamilisha ujenzi wa daraja hilo kwa kilometa 3 na madaraja matatu yameshajengwa yakiwemo daraja la barabara ya Salma Kikwete, daraja la Mtogole na Magomeni makuti

Ameeleza kuwa mradi utakuwa na vivuko vya waenda kwa miguu 15 ambapo hadi sasa vivuko 7 vimeshajengwa na mradi huu utagharimu zaidi ya shilingi bilioni 32,8 ambapo pia utajenga mabwawa 2  eneo la ubungo maji kwa ajili ya kuchukua maji kabla ya kuleta madhara

Aidha, mradi huu utaondoa tatizo kubwa la mafuriko  kwa wakazi zaidi ya kata 6 na mitaa 32 na pia mradi huu utakuwa na sehemu ambazo wananchi watatumia kwa ajili ya kupumzika .

Na Angela Msimbira DAR-ES-SALAAM