Serikali Kuboresha Barabara za Miji 66 Nchini 2019/2020

Imewekwa tar.: July 6th, 2019

Serikali imetenga kilomita moja ya lami kwa miji 66 nchini katika mwaka wa fedha 2019/2020 kama muendelezo wa malengo yake ya kuimarisha barabara na mandhari ya miji yake ambayo ujenzi wake unafanywa kupitia fedha za Serikali na Proramu mbalimbali nchini.

Hayo yameelezwa na Katibu Mkuu Ofisi ya Rais TAMISMISEMI Mhandisi Joseph Nyamhanga alipotembelea barabara ya Rutamba-Mnara-Nyengedi inayojengwa kwa kiwango cha lami yenye umbali wa kilomita moja inayojengwa kwa fedha za Mfuko wa Barabara (road Fund) ambayo utekelezaji wake wa jumla umefikia asilimia 75.

Nyamhanga pia amesema kuwa  utekelezaji wa miradi ya barabara za Halmashauri nchini iendane na thamani halisi ya fedha zilizopangwa ikiwa ni pamoja na fedha za Mfuko wa Barabara zilizotengwa kujenga barabara za Halmashauri nchini na kusimamiwa na Wakala wa Barabara za Mijini na Vijijini Tanzania (TARURA).

Amesema miradi mingine ni ile ya kimkakati kama vile masoko, stendi na machinjio ya kisasa ambayo inatakiwa kusimamiwa kwa umakini ili kufikia malengo ya Serikali ikiwa ni pamoja na kujua mapato yanayotarajiwa na Halmashauri husika, thamani ya fedha na uimara wa miundombinu husika.

Meneja wa TARURA Halmashauri ya Wilaya ya Lindi Mhandisi Dawson Paschal amesema kuwa mradi wa barabara hiyo unagharimu shilingi milioni 360 ambapo mpaka sasa milioni 169 zimekwilipwa lakini pia mradi unakabiliwa na changamoto ya kutokuwepo kwa gari la ofisi kwani lililopo ni chakavu pamoja na ufinyu wa bajeti kwani barabara ina kilomita 48 na kilomita 14.4 tu za lami zimejengwa na kubakiza kilomita 33.6

Mhandisi Dawson Paschal pia amesema kiasi cha fedha shilingi 57,981,100.00 kilichotokana na msamaha wa kodi (VAT) kimetumika kujenga mifereji ya maji kutokana na tatizo la mafuriko eneo la Nyengedi.

Katika hatua nyingine Mhandisi Nyamhanga amekagua hospitali ya Wilaya ya Lindi, Kituo cha Afya Mnazi Mmoja, machinjio ya kisasa, barabara za TARURA na dampo vyote katika Manispaa ya Lindi na kutoa maagizo kwa Kaimu Mkurugenzi wa Manispaa ya Lindi Baptista Kihanzi na Msimamizi wa mradi wa machinjio Bw. Ngongolowo kukamilisha mradi huo katika muda uliopangwa na kutoa taarifa ya matarajio ya mapato ya mradi wa machinjio ambao unatarajiwa ng’ombe 100 watachinjwa kila siku kwa ajili ya kitoweo kwa wakazi wa Manispaa ya Lindi na vitongoji vyake.

Kwa upande wake Katibu Tawala Mkoa wa Lindi Bi. REhema Madenge amesema kuwa pamoja nakufanya kazi kubwa katika miradi watasimamia kwa umakini kuhakikisha miradi inakamilika kwa wakati na kwa thamani ile ile ya fedha.

        Anaandika Fred Kibano