Sera ya Taifa ya Ugatuaji Kuiwanua Wananchi Kiuchumi

Imewekwa tar.: February 3rd, 2020

Serikali inaandaa Sera ya Taifa ya Ugatuaji ambayo itasaidia kuandaa sheria ambayo itamairisha utendaji wa Mikoa na Mamlaka za Serikali za Mitaa kukuza uchumi wa jamii, kuboresha utawala bora na ushiriki wa jamii katika masuala ya sekta mbalimbali.

Hayo yamesemwa na Mkuu wa Mkoa wa morogoro, Mhe. Loata Sanare wakati akifungua warsha ya kukusanya maoni ya wadau katika kuandaa Programu ya Kuimarisha Mikoa na Serikali za Mitaa (Regional and Local Government Strengthening Programme-RLGSP) katika Manispaa ya Morogoro.

“Sera hiyo inakusudia kuongeza kasi ya ukuaji wa uchumi, kupunguza umaskini, kuzalisha ajira na ustawi wa jamii, Kuimarisha mfumo wa Ushirikishwaji wa wananchi kijamii, kisiasa na usimamizi wa Uchumi”

Pia Sanare amesema uboreshaji wa uhusiano kati ya Serikali Kuu na Serikali za Mitaa katika kutoa huduma zilizogatuliwa, Usimamizi wa mazingira na mabadiliko ya Tabianchi, Usawa wa  Kijinsia, Maendeleo mijini na vijijini, Usalama wa chakula na lishe na makundi yenye mahitaji maalum.

Akitoa maelezo ya awali kabla ya ufunguzi wa warsha Katibu Tawala Mkoa wa Morogoro Mhandisi Emmanuel Kalobelo ameishukuru Ofisi ya Rais TAMISEMI kwa kuanzisha Sera ya Taifa ya Ugatuaji inayotolewa maoni kwa lengo la kutoa huduma zilizo bora kwa wananchi kwa wakati na ufanisi.  

Kwa upande wake Mhandisi Enock Nyanda Mkurugenzi Msaidi Idara ya Uratibu wa Sekta Ofisi ya Rais TAMISEMI amesema mbali na kuwepo Mpango wa Maboresho wa kwanza na wa pili, awamu hii kutakuwa na Sera ya Taifa ya Ugatuaji itakayosimamiwa na sheria ambayo itaonyesha ushiriki wa Wadau mbalimbali na itasaidia kutatua changamoto zilizopo katika Mamlaka za Serikali za Mitaa.

Programu hiyo ni mwendelezo wa mambo mazuri yaliyopatikana wakati wa utekelezaji wa Programu za Maboresho ya Serikali za Mitaa zilizotangulia  Awamu ya kwanza na ya pili (LGRP I & II) zilizotekelezwa kati ya mwaka 2000 hadi 2010.

Sera ya Taifa ya Ugatuaji pamoja na  mkakati wake wa utekelezaji umeainisha nguzo kuu 9 ambazo baadhi yake zinalenga kutoa mwongozo kuhusu ukusanyaji na usimamizi wa Rasilimali fedha katika Mamlaka za Serikali za Mitaa ili kutekeleza wajibu wa utoaji huduma kwa mujibu wa sheria, Kuinua na kuimarisha Uratibu wa jitihada za kuendeleza Uchumi wa Maeneo (Local Economic Development) katika ngazi za msingi kwenye Mikoa na Mamlaka za Serikali za Mitaa.

Programu inatarajiwa kutekelezwa kwenye ngazi za Sekretariati za Mikoa na Mamlaka za Serikali za Mitaa kwa kipindi cha miaka 10 kwa vipindi viwili vya miaka mitano mitano ikiwa na lengo la kuona wananchi wanapata huduma bora za kijamii na kiuchumi kwa kufanya mageuzi ya uendeshaji na uwajibikaji wa Mamlaka za Serikali za Mitaa ambapo Ofisi ya Rais TAMISEMI itafanya uratibu wa utekelezaji wa programu hiyo.

Washiriki katika warsha hiyo ni pamoja na baadhi ya Wakurugenzi na wataalam kutoka Ofisi ya Rais TAMISEMI, Wakurugenzi wa Halmashauri, Makatibu Tawala wasaidizi wa Seksheni ya Serikali za Mitaa, Wataalam kutoka Mamlaka za Serikali za Mitaa, Makatibu Tawala wa Wilaya, Wawakilishi wa Asasi za Kiraia na Mashirika yasiyo ya Kiserikali.

          Anaandika Fred Kibano