Mikopo ya Shilingi Milioni 85 yatolewa kwa Vikundi wilayani Bunda

Imewekwa tar.: February 24th, 2021

Nuru Ally, Bunda

Halmashauri ya Wilaya ya Bunda imetoa mikopo yenye thamani ya shilingi milioni 85 kwa vikundi vya Wanawake, Vijana na Watu wenye Ulemavu katika kipindi cha Mwaka 2019/2020, ikiwa ni kutekeleza agizo la serikali kwa kila halmashauri kutenga asilimia 10 ya mapato yake ya ndani.

Aidha Halmashauri hiyo ilitoa kiasi cha shilingi milioni 35, kutoka kwenye marejesho ya Vikundi (Revolving fund) na kufanya jumla ya fedha zote zilizotolewa kwa vikundi 41  vya halmashauri hiyo kuwa shilingi milioni 120.

Mkurugenzi Mtendaji wa Halmashauri hiyo Amos Kusaja amesema fedha hizo ni sawa na asilimia 89.4 kati ya kiasi kilichotengwa na halmashauri kwa ajili ya kukopesha bila riba kwa Wanawake,Vijana na Watu wenye ulemavu.

Amesema jumla ya vikundi 41 vimenufaika na  mikopo hiyo, ambapo vikundi vya wanawake ni 14,Vijana 11 na Watu wenye ulemavu 7.

Amefafanua kuwa wanawake  walipata jumla ya kiasi cha shilingi milioni 40.5 Vijana  milioni 28.8 na Walemavu ni shilingi milioni 15.7.

Kwa upande wake Mkuu wa Idara ya Maendelea ya Jamii Beatrice Gwamagobe amesema kuwa kila Mwaka vikundi vya Wanawake,Vijana na Watu wenye ulemavu  vinanufaika na mkopo usio na riba kutoka  Halmshauri sambambamba na kutoa mafunzo kwa vikundi hivyo.

Gwamagobe ameeleza kuwa  uwepo wa Semina kwa wanufaika wa  mkopo usio na riba umeweza kusaidia  vikundi hivyo kutumia fedha hizo kwa kuendeleza shughuli za kijasiliamari na kupelekea vikundi vingi vinavyo nufaika na mkopo usio na riba kufanikiwa.

“Mafunzo kwa wanawake,Vijana na Walemavu imesaidia kwa kiasi kikubwa kwa wanufaika kuweza kujiendeleza kuzalisha shughuli nyingine  na kupelekea urahisi wa marejesho ya mkopo huo”.

Gwamagobe amesisitiza kuwa vikundi vyote vinafuata taratibu za kifedha  kwa kufanya marejesho kwa wakati pamoja na kuhakikisha fedha walizopatiwa kuwa zinafanya lengo lililokusudiwa.

‘kila mwanakikundi anawajibu wa kufuata taratibu za kurejesha mkopo aliopatiwa na hi imesaidia  kufikisha malengo ya  kila mtu,”amesema Gwamagobe

Miongoni mwa vikundi vilivyonufaika na mikopo hii isiyo na riba ni kikundi cha Wanawake TUINUANE ambapo Leticia Finiasi, kwa niaba ya wanachama 11 wenzake kutoka Kata ya Nansimo Kijiji cha Nansio kupokea shilingi milioni 4 ambazo walizizalisha kwenye shughuli zao za kilimo cha Bustani na kupata kiasi cha shilingi milioni 13.6.

Naye Salum James kutoka kikundi cha MAPINDUZI GROUP ambacho kinajishughulisha na kilimo cha bustani pamoja na Ufugaji wa samaki katika mabwawa kilichopo kata ya Butimba amesema kuwa mkopo usio na riba umesaidia kuendeleza kilimo na ufugaji wa samaki.

Ameongeza kuwa kikundi chao kilipokea shilingi milioni 6 ambapo imewasaidia kupanua mradi kutoka katika ufugaji wa Samaki katika bwawa mpaka kilimo cha umwagiliaji cha hekari 2 za nyanya.

‘Mkopo huu umeweza kusaidia kutupatia mafanikiwa makubwa  ya kupanua mradi wetu pamoja na kutengeneza ajira kwa watu wasiopungua 50,” amesema James.

Kwa upande wake Clifford Makaranga, katibu wa kikundi cha Albino kinachojishughulisha na uuzaji wa nafaka katika Kata ya Chitengule kijiji cha Busambara amesema mkopo usio na riba umewasaidia kupata kipato ambacho huwendesha maisha yao ya kila siku na kuwaepusha kuishi maisha ya kuomba omba kutokana na hali yao ya ulemavu wa ngozi.

‘Tunashukuru serikali kwa kutuangalia na sisi walemavu maana hii inatusaidia kutokuwa ombaomba,” amesema makaranga.

Halmashauri ya Wilaya ya Bunda katika mwaka 2020/2021 imetenga kiasi cha  shilingi milioni 105.8  kwa ajili ya kutoa mikopo ya isiyo na riba na mpaka sasa kiasi cha shilingi milioni 32 kimetolewa kwa makundi hayo.