Mamlaka za Serikali za Mitaa zatakiwa kuweka agenda ya upimaji wa magonjwa yasiyoambukiza.

Imewekwa tar.: November 12th, 2019

Waziri wa Nchi Ofisi ya Rais, Tawala za Mikoa na Serikali za Mitaa (TAMISEMI) Mhe. Selemani Jafo amezielekeza Mamlaka za Serikali za Mitaa kuhakikisha kila kituo cha afya nchini kinaweka ajenda ya kudumu ya upimaji wa magonjwa yasiyoambukiza ili kuwasaidia wananchi wenye matatizo ya kiafya katika Mamlaka hizo.

Mhe.Jafo amesema hayo leo kwenye uzinduzi wa upimaji wa magonjwa yasiyoambukiza yanayofanyika katika viwanja vya Jamhuri Jijini Dodoma wakati wa maadhimisho ya kitaifa ya wiki ya kuzuia na kudhibiti magonjwa yasiyoambukiza nchini.

“Wakurugenzi wa Halmashauri na Waganga Wakuu hakikisheni mnasimamia ajenda hii kwa weledi mkubwa ili kuimarisha afya za watanzania kwa lengo la kuinua uchumi wa taifa letu kwani bila afya bora watu hawataweza kufanya kazi kwa ubora unaotakiwa.” amesisitiza Mhe.Jafo

Mhe.Jafo amesema kuwa ni vyema kuanzisha kiliniki maalumu kwa ajili ya upimaji wa magonjwa yasiyoambukiza katika Halmashauri ili kusaidia kubaini watu wenye magonjwa hayo kwa haraka na kuweza kupatiwa tiba sahihi.

“Kiliniki hizi zitasaidia watanzania kuweza kupata ushauri wa afya zao, upimaji wa afya na tiba juu ya magonjwa haya yasiyoambukiza lengo ikiwa ni kujenga utamaduni kwa watu kwenda wenyewe kupima kwa hiari bila kulazimishwa” ameeleza Mhe. Jafo

Mhe. Jafo ametoa rai kwa wananchi  wote  kufanya mazoezi , kula vyakula kama matunda, mbogamboga na kujiepusha na matuzi ya vyakula  vyenye wanga mwingi, sukari, chumvi na mafuta ili kujiepusha na magonjwa yasiyoyakuambukiza na  kuimarisha nguvu kazi ya taifa .

Naye Mkuu Mkuu wa Wilaya Dodoma Bw. Patrobas Katambi amewataka wananchi kujenga utamaduni wa kufanya mazoezi ili kulinda afya zao na kuepuka magonjwa yasiyoambikiza.

Wakati huohuo, Kaimu Mkurugenzi wa Magonjwa yasiyoambukiza Dkt. Sarah Maongezi amesema maadhimisho hayo yataenda sambamba na upimaji wa afya, ushauri wa afya kutoka kwa wataalam wa afya,  matamasha ya michezo na kongamano la kisayansi litakalojadili magonjwa yasiyoambukiza litakalofanyika 12-13 Novemba , 2019 na kuzindua mpango wa kuzuia na kupambana na magonjwa yasiyoambukiza.

Aidha, kauli mbiu ya maadhimisho hayo ni “Tutembee pamoja katika kuzuia na kudhibiti magonjwa yasiyoambukizwa” lengo likiwa ni kuhimiza ushirikiano katika kudhibiti magonjwa haya kwani mapambano dhidi ya vihatarishi vya magonjwa yasiyoambukiza yanahusisha mshikamano wa sekta mbali mbali, wadau, mtu mmoja mmoja na wananchi kwa ujumla.