JAFO alia na riba kubwa za mikopo zinazotolewa na mabenki nchini

Imewekwa tar.: August 22nd, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe, Selemani Jafo amesema kuwa suala la mikopo wanayopewa waalimu na watu mbalimbali  nchini na  taasisi za kifedha zimekuwa ni  changamoto jambo ambalo linawasababisha kutokupata maendeleo stahiki na kuwa na madeni makubwa ambayo yanawasababishia umaskinii

Ameyasema hayo wakati akifungua siku wa waalimu kupitia benki ya NMB iliyofanyika leo katika ukumbi wa LAPF Jijini Dodoma.

Mhe. Jafo ameiomba benki ya NMB nchini kuhakikisha wanafanya utafiti wa kuwatambua wateja ambao ni wafanyakazi hasa Waalimu wanapatiwa mikopo yenye riba nafuu ambayo itawasaidia katika kujiongezea kipato na kujipatia maendeleo binafsi.

Ameendelea kufafanua kuwa benki hiyo inahitaji kuweka mikakati ya kuwasaidia waalimu pindi wanapokopa katika taasisi za kibenki kwa kuwapunguzia riba hadi kufikia digiti moja jambo ambalo litawafanya waalimu wengi kupata fursa ya kukopa na kujiendeleza kiuchumi.

Amesema lengo la mikopo ni kuwasaidia waalimu ili wajikwamue kiuchumi hivyo kwa kuweka riba kubwa kunasababisha waalimu wengi nchini kubaki maskini na kujikuta wanakopa kila mahali kutokana na fedha yote ya mshahara kuishia kwenye kulipa mikopo.

“Waalimu wakiajiriwa wanauhakika na ajira hiyo hadi kustaafu hivyo akikopa benki inauhakika na mteja huyo, sasa kwa nini riba ya mwalimu inakuwa sawasawa na mfanyabishara mkubwa au mfanyakazi ambaye ameajiriwa kwa mkataba, ninawaomba benki ya NMB mliangalie hilo ili waalimu wengi wajikwamue kiuchumi”Amesema  Mhe.Jafo

Amesema kuwa watumishi wengi wakiwemo waalimu wamekuwa wakiteseka na mikopo ambayo imekuwa ikitolewa na taasisi za kibenki jambo ambalo linasababisha malengo ya kufikia uchumi wa kati kuwa ni ndoto kwa watumishi wengi nchini.

“Ikifika tarehe 21 kila Mtumishi akiwemo mwalimu nchini kichwa kinamuuma kwa kuwa mshahara unakuwa umetoka lakini madeni aliyonayo yanazidi mshahara uliowekwa benki jambo ambalo linawafanya waalimu wengi kubaki maskini kila siku na kuwa watumwa wa mikopo” Amesema Mhe. Jafo.

Mhe. Jafo anafafanua kuwa Mikopo inawasaidia wananchi na hasa waalimu lakini bado wanateseka na riba kubwa zinazotolewa na mabenki jambo ambalo linawaumiza na kuwa watumwa wa kulipa madeni na sio kujikwamua kiuchumi.

Wakati huohuo Mhe. Jafo ametoa onyo kwa waalimu nchini kuacha kukopa mikopo kwa tamaa bali wakope kwa malengo ili kutimiza malengo yao ya kujiongezea kipato

“Waalimu wanaenda kukopa kwenye Sacoss hadi kadi zao za benki zinaachwa huko, mwalimu anatoa mpaka namba ya siri ya kadi yake ili mshahara ukiingie akatwe mkopo,hii si vizuri hata kidogo kwani waalimu wanadhalilika mitaani ” Amesema Mhe. Jafo.

Amewataka waalimu kuacha tamaa, bali waishi kulingana na kipato unachokipata, kwa kuwa kinachotokea baada ya kuwa na mikopo mingi ni waalimu wengi kudhalilika katika jamii

Aidha Mhe. Jafo ameitaka  benki ya NMB kuja na mkakati wa kuwasaidia waalimu katika kujikwamua kiuchumi na kujiongezea mapato lengo likiwa ni kupunguza umaskini nchini.

Na. Angela Msimbira OR-TAMISEMI