Jafo akemea mlundikano wa taka kwenye dampo la Dodoma

Imewekwa tar.: January 17th, 2020

Waziri wa Nchi, OR-TAMISEMI Mhe. Selemani Jafo amekemea hali ya mlundikano wa takataka kwenye madampo ya kisasa yaliyojengwa kwenye baadhi ya Majiji na Manispaa nchini kupitia mradi wa mpango miji ya kimkakati (Tscp).

Waziri Jafo amekemea hali hiyo wakati alipotembelea dampo la Chidaya lilipo Jijini Dodoma na kukuta mlundikano wa taka ambayo zimesababisha hali ya uchafu, inzi na harufu katika eneo hilo la kuhifadhia taka.

“Madampo haya yamejengwa kwa gharama kubwa sana na yana lengo la kuimarisha usafi kwenye miji yetu na kuchataka taka hizo kwa utaalamu wa kisasa kabisa usioleta athari zozote za kimazingira huku yakihakikisha usafi wa eneo la dampo unazingatiwa” alisema Jafo.

Aliongeza kuwa naona mitambo ya kuchakata taka hizi imeegeshwa tu na haifanyi kazi na takataka zimelundikana hapa na taarifa mnazonipa haziniridhishi, sioni sababu yeyote ya msingi inayopelekea uongozi wa dampo hili ushindwe kushindilia hizi taka kila zinapoletwa.

Jafo aliagiza uongozi wa Jiji la Dodoma kuongeza usimamizi katika Dampo hilo ili kazi iweze kufanyika kama inavyotakiwa ili kukamarisha usafi wa Jiji la Dodoma ambapo ndipo Makao Makuu ya Nchi.

Pia Waziri Jafo ametoa wiki mbili kwa uongozi wa Jiji la Dodoma kukamilisha matengenezo ya mitambo yote ambayo inahitilafu ili iweze kuwa sawa na kutumika katika kuchakata na kusindika taka katika Dampo la Chidaya.

“Wakati natembelea madampo mengine nilikuta Manispaa ya Kigoma  mitambo imeegeshwa tu bila kufanya kazi inayotakiwa na niliwaambia kuwa mitambo ile nitaihamishia Dodoma kwenye Dampo hili  lakini kwa hali hii siwezi kuleta ile mitambo rekebisheni hii yenu haraka ili kazi za hapa ziendelee kama inavyotakiwa alisisitiza Waziri Jafo.

Akitoa ufafanuzi katika ziara hiyo Mkurugenzi wa Jiji la Dodoma Godwin Kunambi kuwa kwenye bajeti ya mwaka 2019/20 imetengwa bajeti ya shilingi mil 600 kwa ajili ya uendeshaji wa mitambo na dampo la Chidaya hivyo hakuna upungufu katika fedha za uendeshaji na usimamizi ila changamoto hii iliyotokea ya ubovu uliotokea wa mitambo hii haujakwamishwa na uhaba wa fedha ila ni upatikanaji wa vipuli vya mitambo hiyo.

Naye Kaimu Mkuu wa Idara ya mazingira Ally Mfinanga alisema mitambo hiyo iliharibika mwishoni mwa mwezi Novemba, 2019 na mvua zinazoendelea kunyesha zimesababisha magari ya taka kumwaga taka mwanzoni hapo bila kusambazwa kwa sababu gari la kusambaza haliwezi kufika eneo la taka kutokana na mvua hizi.

Aliongeza kuwa mitambo miwili iliyoharibika tumeshaanza mchakato wa kutengeneza magari hayo na yatatengemaa baada ya muda mfupi na kazi ya kuchakata na kusindikika taka hapa Dampo itaendelea vizuri na kwa ufanisi kama ilivyokuwa kama awali.

Dampo hili la kisasa limejengwa kupitia mradi wa mpango miji mkakati na madampo yenye hadhi hii yamejengwa katika Miji ya Tanga, Arusha, Mbeya, Mwanza, Kigoma pamoja na hapa Dodoma.

Mwisho.