Halmashauri zatakiwa kusimamia kwa karibu miradi ya ujenzi inayotekelezwa kupitia Force Account

Imewekwa tar.: February 13th, 2019

Na Mathew Kwembe, Morogoro,

Serikali imewataka viongozi wa Mamlaka za Serikali za Mitaa kuhakikisha kuwa wanasimamia kwa karibu utekelezaji wa ujenzi wa miradi mbalimbali ya maendeleo ili kuleta matokeo yanayotarajiwa kwa umma.

Wito huo umetolewa leo na Mkurugenzi wa Serikali za Mitaa kutoka Ofisi ya Rais Tawala za Mikoa na Serikali za Mitaa Dkt Charles Mhina wakati akizungumza na Maafisa Manunuzi kutoka halmashauri 118 wanaoshiriki mafunzo kuhusu marekebisho ya sheria ya ununuzi wa umma  na kanuni zake na mfumo wa utoaji taarifa za manunuzi (PMIS) yanayofanyika mkoani Morogoro.

Dkt Mhina aliwaambia Maafisa Manunuzi hao kuwa halmashauri haiwezi kutekeleza miradi ya maendeleo kwa kutumia force account bila ya kuwatumia wataalamu wake kwani wana jukumu kubwa la kusimamia na kutoa ushauri wa kitaalamu katika utekelezaji wa mradi.

Aliongeza kuwa kwa mujibu wa mwongozo uliotolewa na serikali karibu kila kamati inayohusika katika utekelezaji mradi iwe kamati ya ujenzi, manunuzi, au mapokezi ya vifaa ni lazima iwe na mtaalamu wa halmashauri.

Hivyo Dkt Mhina alisisitiza kuwa endapo kamati hizo zitatekeleza majukumu yake ipasavyo, mfumo wa force account utakuwa na tija kwa halmashauri kwani utawezesha miradi mingi ya ujenzi kukamilika mapema na kuonyesha thamani halisi ya fedha zilizotumika kwenye ujenzi wa miradi hiyo.

Aliongeza kuwa mfumo wa force account unahitaji uongozi wote wa halmashauri uwajibike kwa pamoja katika utekelezaji wa miradi ambapo pia watawajibika kuhakikisha kuwa ujenzi husika unazingatia vigezo vya ubora ili viendane na thamani halisi ya fedha zilizotolewa.

"Force account lengo lake ni kupunguza gharama za ujenzi, hivyo liability ya ubora inahamia kwa mmiliki ambapo halmashauri kupitia kwa mhandisi wa ujenzi anabeba jukumu la kutoa ushauri wa kitaalamu na kuhakikisha kazi inakuwa bora kwa vigezo vilivyowekwa badala ya jukumu hilo kumtwisha mkandarasi,"alieleza Dkt Mhina.

Alisema mfumo huu ni mzuri kwani mahali ambapo mkandarasi angedai alipwe shilingi milioni mia nane zaidi ya gharama halisi za ujenzi kupitia force account fedha hizo zinaokolewa kwani jukumu la usimamizi na mwajibikaji wa ujenzi ni Mhandisi wa ujenzi wa Halmashauri.

Dkt Mhina aliongeza kuwa hata Ofisi ya Rais TAMISEMI inajenga jengo la ghorofa makao makuu Dodoma kwa kutumia mfumo wa Force Account ambapo ili kupata matokeo yanayotarajiwa, viongozi wote wa wizara akiwemo Waziri wa Nchi wamejipanga kuhakikisha kuwa wanasimamia kwa ukaribu ujenzi wa jengo hilo ili likamilike kwa wakati na ubora unaotakiwa.

" Wakuu wote wa Idara wa Ofisi ya Rais TAMISEMI tumepangiana zamu za kuwa site (eneo la ujenzi) pale Mtumba na tunahakikisha kuwa tunasimamia kamati zote za ujenzi kuanzia ile ya mapokezi ya vifaa, manunuzi, na ya ujenzi ili tuweze kukamilisha ujenzi kwa wakati," alisisitiza.

Kwa mujibu wa Dkt. Mhina, Viongozi wa Halmashauri wanapaswa kujipanga vizuri kutekeleza miradi ya ujenzi wa vituo vya afya, hospitali za wilaya na miradi mingine ya maendeleo inayotekelezwa katika halmashauri zao kwa kuisimamia kwa ukaribu.

Mafunzo ya siku nne ya marekebisho ya sheria ya ununuzi wa umma na kanuni zake yanaendeshwa na Ofisi ya Rais Tawala za Mikoa na Serikali za Mitaa kupitia Programu ya Maboresho ya Fedha za Umma Awamu ya V (PFRMP V) kwa kushirikiana na Mamlaka ya Udhibiti wa Ununuzi wa Umma (PPRA).