Halmashauri 28 zatakiwa kukamilisha ujenzi wa Hospitali mpya ndani ya miezi mitatu

Imewekwa tar.: July 1st, 2020

Naibu Katibu Mkuu Ofisi ya Rais Tawala za Mikoa na Serikali za Mitaa anayeshughulikia masuala ya Afya  Dkt. Dorothy Gwajima ameziagiza  Halmashauri zote 28 kukamilisha ujenzi wa Hospitali mpya ndani ya miaka mitatu.

Ametoa maagizo hayo leo wakati alipofanya  ziara ya kustukiza katika eneo la mradi wa ujenzi wa hospitali mpya ya halmashauri ya Wilaya ya Chalinze.Mkoani Pwani.

Amesema kuwa hospitali hiyo ni kati ya 28 mpya zinazojengwa katika halmashauri mbalimbali nchini ambazo, mwishoni kwa mwaka wa fedha wa 2019/20 Serikali imetoa shilingi  bilioni 14 kwa wastani wa shilingi milioni 500 kila moja ili kuanza ujenzi wa majengo mbalimbali.

Dkt Gwajima ameupongeza uongozi wa Mkoa wa Pwani na Halmashauri ya Chalinze kwa kuanza vizuri na kutumia siku zao 14 za mandalizi ya uratibu wa ujenzi.

"Nimeridhika  na eneo ambalo kwa  sasa tayari eneo eneo hilo limesafishwa na vifaa kupokelewa kwa ajili ya kuanza ujenzi rasmi , hivyo ni matumaini yangu kuwa ujenzi huo utakamilika kwa wakati"Anaeleza Dkt Gwajima

Ameelekeza majengo ya awamu  ya kwanza yakamilike ndani ya muda usiozidi miezi miwili ili yaweze kutua huduma kwa jamii.

Dkt Gwajima , amezitaka halmashauri zote zilizopokea fedha kwa ajili ya ujenzi wa awamu hii kuweka ratiba ya kazi  zitakazofanyika kila siku huku wataalamu wa afya wakiwa karibu na utekelezaji huo katika kila hatua na kutoa taarifa ya maendeleo kila baada ya siku saba.

Amesema kuwa wakataokamilisha ujenzi kwa wakati na ufanisi  ndio watakaopatiwa  fedha za awamu inayofuata ya mwaka 2020/21 na wasiokamilisha kwa wakati watakuwa na hoja ya kujibu na hatua stahiki zitachukuliwa.

Aidha, Dkt Gwajima amewashukuru wananchi kwa ushirikiano wao kupitia Kamati za Uratibu wa ujenzi , jambo ambalo limeleta matokeo makubwa katika kuleta maendeleo nchini.